فقط في المحروسة!

البلد الوحيدة اللي كل الناس فيها مهندسين!

كوستا

أنا بأحب كوستا..

طبق سلطة!

في مرة كنت بأتغدى أنا وأميرة وعملت طبق السلطة بتاعي كده :)

(f)

هام وعاجل إلى أميرتي ..


في كلمة مهمة عاوز أقولهالك ..


حاسسها أوي أوي ..


أميرة ..

بس خلاص ;)

انتقام التونة!

جريمة لا تغتفر..

أن يكون سحورك تونة بالشطة قبيل الفجر مباشرة ولا تتاح لك الفرصة لشرب المياه، بعد يومين فقط من استقالتك!

سؤال "وغودي"!

أمام كشك صغير بيبيع حاجة ساقعة وقفت أنا وأسامة بعد مشوار رخم، نظر هو للزجاجة في يده وقال :

- هو الدنيا كان شكلها عامل ازاي قبل البيبسي؟
قمت بالرد عليه بمنتهى التلقائية :
- بالظبط زي شكل الدنيا قبل الكاتشب!!

shortcuts

(1)

كان يعلمنا في حصته أن “أقصر الطرق بين نقطتين هي القطعة المستقيمة” لكنه نسي أن يخبرنا أنها "الأصعب أيضا”..

(2)

حطوه في مفترق طرق.. وخيروه

شق طريق جديد في النص وقال لهم :

“مش متعود على الطرق متمهدة“!

(3)

قالت له : “ما وحشتكش؟!"

التفت إليها ليرد فلم يجدها..

ولم يستطع العودة للنوم!!

(4)

ولازلت مقتنعا أننا نفقد برائتنا بمنتهى البراءة.

(0)

لولا أنت أميرتي ..

لظلت الدنيا عندي كما هي لا تتغير .. Copy & Paste!!

.

بيان هام..

أعلنت جمهورية حلوان الكبرى* استقلالها وفرضها سيادتها الكاملة على أراضيها السابع عشر من أبريل الحالي، ومزاعم حول محاولة البرنس الرفيق** أحمد الهواري موفد الجمهورية المذكورة في القاهرة مد جسور وكباري العلاقات الدبلوماسية بين البلدين..

هذا ويتوجه صاحب المدونة بأحر التهاني القلبية لشعب حلوان الشقيق وما يتبعه من مستعمرات، وذكرت مصادر لصيقة بصاحب هذه المدونة أن ثمة علاقة صداقة تربطه بأحمد الهواري، كما اكتشف بعض المؤرخين علاقة قرابة تربطه بخالتين تسكنان مستعمرة "15 مايو" التي أعلنت الجمهورية ضمها لسيادتها..

وقد صرح متحدث رسمي باسم مدونة مصعب الخير عن رغبته في التوسط بين البلدين لإنجاح مساعي السلام (غير دار السلام اللي في الطريق وأنت جاي بالمترو من حلوان!) التي بدأها موفد الجمهورية الهواري واستعداده التام لبذل أي مجهود الكتروني في حال تعثر هذه الجهود

جدير بالذكر أن بعض أعضاء السلك الدبلوماسي بحلوان يسعون للإطاحة بالهواري متهمين إياه بالخيانة العظمى بعد أن سمعه البعض يقول ذات يوم عن البلد الشقيق "Hell – wan” على سبيل المزاح مع بعض أصدقائه، الأمر الذي رفضه متحدث باسم مكتبه متسائلا "كيف يمكن أن يخون شخص ما دولة قبل أن توجد" واصفا هذه الاتهامات بالطفولية وأصحابها بأنهم "شخصيات سقيلة ما بتعرفش تهزر"

وقد توافدت أنباء جديدة عن هتافات ترددت داخل حدود الدولة الجديدة تقول :

“الله .. الوطن .. حلوان"

نبأ عاجل (تصحيح يعني):
قام مواطن حلواني بالتعليق على هذه التدوينة مصححا الهتاف الذي أطلقته جموع الشعب الحلواني إلى

"الله .. حلوان .. أبورجيلة"

وقام الهواري بدوره في تعليق آخر بالتصديق على هذا الهتاف..

-----
* لمزيد من المعلومات طالع صفحة حلوان على الويكيبيديا
** حقيقة علمية!

جيزة مترو جامعة..

(1)

امبارح كنت في الشغل رغم إنه يوم أجازة، وكان ورايا مشوار في الجيزة، فنزلت علشان أروح مشواري وأرجع تاني ع المكتب..
ركبت ميكروباص جيزة زي بقية البني آدمين..

من المعروف من الدنيا بالضرورة في مصر دلوقتي إن الميكروباصات بقت مافيا جديدة، بتقسم الطريق وساعات فجأة تلاقي

- "يللا الآخر يا جماعة"

بصوت رخم أوي من واحد أرخم علشان ينزل الركاب قبل محطتهم الأخيرة بشويتين علشان يلحق يلف ويعمل دور تاني!!
ده اللي حصل معايا وأنا رايح الجيزة بس الراجل ما كانش وقف بعيد أوي وكمان كان وقف قدام الشارع اللي أنا هأروح فيه فطبيعي إني أنزل*..

شخص كبير في السن شوية كان قاعد ومارضيش يقوم وكلم الأسطى وقال له اطلع قدام شوية لسة الآخر ما جاش..

ده برضه طبيعي..

اللي مش طبيعي وحرق دمي الشخص اللي كان واقف ورايا، كان قام خلاص وماشيين في الأروقة بتاعت الميكروباص علشان ننزل ولقيته بيبدأ حوار مع الراجل اللي كلم السواق..

- "ما هم السواقين اتعودوا على كده خلاص وعلى طول بيعملوا كده"..
عادي الراجل بيقر واقع، إنما اللي غاظني بجد :
- "عارف أنت لو كل الركاب يقعدوا ويقولوا للراجل لسة قدام شوية؟! ما كانش ده هيحصل"،
يبقى قايم نازل وبيقول كده!!!

كان في كام موقف مستفزيني من الصبح بس طلعت في الراجل ده، التفت له وقلت له :

- "طيب ما تقعد!!"

لقيت علامات على وشه أشك إنها علامات عته مغولي من كتر الدهشة والذهول..

حقيقي :
لا تنه عن خلق وتأت مثله.. عار عليك إذا فعلت جامد أوي!

(2)

أخيرا هأشوف الكابينة تاني!!

أنا بأتكلم عن المترو يا جماعة، أصل إدارة المترو "الحكيمة" قررت فجأة إن عربية السيدات بدل الأولى والتانية هتبقى عربيتين في وسط المترو.. وبدأ تنفيذ القرار النهاردة..

عسكري وضابط واقفين قدام عربيات السيدات (اللي في منتصف المترو) وبينبهوا على الرجالة اللي طالعين فيهم كما اعتادوا،
بس سايببن السيدات واقفين عادي خالص عند العربية الأولى والتانية (عربات السيدات سابقا، شارع لطفي حاليا!) من غير ما يقولوا لهم!!

أنا النهاردة ركبت العربية التانية اللي كانت قدام السلم أول ما دخلت علشان ألحق المترو قبل ما يقفل..
نظرات الدهشة والاستغراب على وش كل السيدات اللي طالعين العربية كانت محتاجة تتصور فيديو..
زي ما يكونوا حاسين إن في ثورة حصلت!!

ما علينا
أنا مش هأناقش مدى جدوى الحركة اللي عملوها..
أنا بس فرحان إني هأشوف الكابينة بتاعت السواق تاني لأني شفتها مرة وأنا صغير وكنت مبسوط، وبأحب أتفرج على النفق والمترو ماشي من زجاج السائق..
وبقالي فترة منتابني رغبة إني أشوفها وحقد دفين على السيدات إنهم لوحديهم اللي كان ليهم الحق ده..

مبروك يا رجالة..

-----
* عادة ما بأنزلش من الميكروباص غير لما أوصل المكان اللي المفروض أوصله..

الإفطار الأخير

طبق فتة شاورما من أبورامز
الساعة 12 ونص بالليل (لأني نسيت آكل ساعة المغرب)
30 رمضان 1428


بس خلاص!

وكل سنة وأنت :-)

كل سنة وانتوا كلكم طيبين
كل سنة وانتوا كلكم :-)
النهاردة يا جماعة عيد ميلاد الـdigital smiley face ده :

:-)

اللي معظمنا تقريبا حافظه وبيستخدمه في الكلام كل يوم على الماسينجر، أو في منتدى أو حتى على الـIRC

من خمسة وعشرين سنة، وبالتحديد يوم 19 سبتمبر 1982 الساعة الواحدة إلا ربع صباحا كتب سكوت فاهلمان أو Scott E. Fahlman، المدرس بجامعة "كارنيجي ميلون" Carnegie Mellon موضوع في منتدى بيقترح فيه إن الناس تستخدم الاختصار ده : :-) للدلالة على إن واحد بيبتسم وتشوفها وأنت مميل راسك شوية
نص البوست بتاعه :

19-Sep-82 11:44 Scott E Fahlman :-)
From: Scott E Fahlman

I propose that the following character sequence for joke markers:

:-)

Read it sideways. Actually, it is probably more economical to mark
things that are NOT jokes, given current trends. For this, use

:-(

دلوقتي ما أقدرش أتخيل الـchats والـforum threads من غيرها
شكرا يا Scott
وكل سنة والـsmiley طيب :-)

النهاردة اجتماع!

النهاردة كان عندي اجتماع طويل أوي جدا موت خالص في الشغل

يا جماعة أنا مفهومي عن أيام الأسبوع اتغير..

السبت، الاجتماع، الاثنين، الثلاثاء، الأربعاء، الخميس، الجمعة !!

من القلب لرفيقة الدرب..

رفيقة دربي
وملكة قلبي التي لم أرها بعد

زوجة الغد العزيزة

انا أعلن منذ الآن أنني مستعد أن أقدم كل التضحيات التي أستطيع

أعدك ألا أدعك تحتاجين شيئا أبدا
أعاهدك أنك إذا طلبت مني نجوم السماء سأبذل قصاري جهدي أن أحضرها
إذا أشرت بإصبعك إلى القمر سأصعد بك هناك

سأكون لك نعم الزوج
ونعم الرفيق
ونعم الصديق

فقط أريد منك شيئا واحدا

حبيبتي التي لم ألتق بك بعد
إذا كان الليل
برومانسيته الحالمة
وسحره الرائع
وحان وقت الطعام

فلا تسأليني أبدا
"تاكل ايه يا حبيبي؟!"

فلست على استعداد بعدكل العذاب الذي أعانيه كل وجبة في اختيار ماذا نأكل أن أسمع هذا السؤال بعد الزواج!!!

هلاويس.. لسة!

معروف عني في المكتب وفي العائلة بعض الحقائق

ما بأحبش آكل سكريات كتير، وأفضل أكل الحاجات المالحة
بأحب أشرب سوائل مسكرة
بأعشق اللبن
بأعشق البيبسي
حتى لما بآكل سكريات بأحب الحاجات البيضا.. شوكولاتة بيضاء أكتر من العادية، كريمة أكتر من الشوكولاتة في الجاتوه، فانيليا أكتر من الشوكولاتة في الآيس كريم وهكذا..


المهم.. كنت قاعد امبارح مع هواري، وقلت له

"هو يا أخي مش ناويين يعملوا بيبسي باللبن؟!”

بصلي كده وسكت.. فلقيت نفسي مضطر أشرحله..

“أصلي ساعات يا هواري بأبقى عطشان أوي وعندي في نفس ذات الوقت حموضة.. فبأبقى عاوز أشرب بيبسي ساقع كده علشان يقتل العطش اللي في زوري.. بس الصودا بتشعلل الحموضة.. وفي نفس الوقت نفسي أشرب لبن علشان يقضي على الحموضة بس لبن اليومين دول مغشوش فما بيشبعش العطش زي ماهو المفروض (أصل اللبن الحاجة الوحيدة اللي ممكن تستغنى بيها علميا عن المياه والأكل وتعيش عليه طول عمرك.. بس مش لبن اليومين دول) ..

ده حاجة، حاجة تانية بقى إني ما بأعرفش أشرب بيبسي على بطن فاضية، وده بيجنني “

هواري بصلي وضحك.. وقضينا الليلة وعدّت.. وقمت النهاردة الصبح عطشان، وعندي حموضة، بس ما لقيتش هواي علشان أسأله.. فاضطريت أتسائل مع نفسي:

إلا هم صحيح مش ناويين يعملوا بيبسي باللبن؟!

Artie و كنبورة..

لقد اتخذت قرارا .. وأريدكم جميعا أن تساعدونني عليه..
لقد مررنا (أنا ولابتوبي) بفترة عصيبة.. بحثنا خلالها كل سبل الحرب والسلام..
قصدي دورنا سوا على اسم ينفعه كتير..

وأخيرا لقيت له اسم عاجبني
Artie
بالعربي
آرتي

يعني دلع art (فن) .. علشان واحنا قاعدين لوحدينا أنا وهو بنفنن أوي ..
بأحس معاه بهمسات الصفر والواحد
بألمس روح العمليات اللي بتتم جو
بأكلمه.. وبأقول له كل أسراري .. وعمره ما أفشى سر واحد
وحاجات تانية كتير
"أشاعير ومحاسس" بجد ما تتوصفش

يا عيني المسكين اتبهدل معايا كتير.. خصوصا وأنا بأنقل من windows لـ linux
ومكان ايدي من كتر ما بنقعد سوا لونه طلع..
بس أنا بأحبه أوي.. وحاسس إن هو كمان بيحبني
بكيبورده اللي صوابعي بتعشق تجري عليها..
بشاشته اللي بتفتح لي دنيا تانية خالص.. عالمي الأول..
بكل تفاصيله "الكميلة"..
بقالنا مع بعض دلوقتي حوالي سنة

ده القرار الأول ..


القرار التاني..

نظارتي .. بأحبها أوي برضه.. سميتها كنبورة
عمري ما حسيت بوزنها على وداني ولا عمرها ضايقتني
ومستحملاني لغاية دلوقتي..


ربنا يخليكم انتوا الاتنين لي
رحبوا معايا بعائلتي الصغيرة ..
Artie و كنبورة
`

عيد بأي حال عدت؟!

ما علينا..
مش ناقصة نكد..
لذلك سأكتفي ببيت الشعر القائل :

"عيد بأي حال عدت يا festival... بأمر قد مضى فيك أم فيك renewal"!

كل سنة وانتوا طيبين..
بمناسبة عيد الأضحى..
والكريسماس..
والسنة الجديدة..

كل سنة وانتوا كلكوا طيبين،
ويا رب تحققوا اللي في نفسكم..

--------
(1) بيت الشعر من تحويري
(2) الصور جايبها من موقع sheepCafe اللي عرفته من تدوينة عند عصفورة في الساحة

علشان احنا مع بعضينا..

علشان احنا مع بعضينا..
ولأول مرة لوحدينا..
والخ الخ!

للمرة التانية اوعوا حد يفهم غلط!
أصلي امبارح كنت بأغني "هأقابله بكرة"!
آه والله زي ما بأقول لكم كده..
وبعد ما غنيتها روحت البيت نمت..
وكان المفروض أستلمها النهاردة..
هي ايه؟
النضّارة يا أخي .. النضّاااااارة..

المهم.. اتصلت بالمحل قال هتيجي الساعة 2..
رحتله الساعة اتنين..

- "لسة ما جاتش، تعالى كمان نص ساعة"!
- "نص ساعة بالظبط؟"
- "أيوة إن شاء الله.. معلش احنا آسفين"

رحت أنا ومحمد تاني بعد نص ساعة صياعة في الرويال بيكري وكوبايتين مشروب عجيب هو اختاره ورغي..
(أصل محمد جي معايا و أنا بأنقيها، و جي يستلمها معايا مشكورا)..

- "اتفضلوا استنوا هي طلعت من المعمل بس لسة في الطريق"!!


قعدنا مستنيين و بعد حوالي كتير من الانتظار محمد جاتله فكرة "نيرة"

- انتوا عندكو خدمة التوصيل للمنازل؟
- لا يا افندم، بس علشان دي غلطتنا احنا ممكن نوصلهالكم
- طيب تمام

اديناهم العنوان و رجعنا المكتب

ساعتين كده و لقيت اتصال على الموبايل :
- الو، أستاذ مصعب معايا
- أيوة يا افندم
- النظارة بتاعت حضرتك خلصت، تحب حضرتك نبعتهالك و للا تيجي تاخدها
- لا لا أنا جاي

بيني وبينكم أصل الساعي عندهم كان عجوز شوية، فما رضيتش أخليه ييجي المشوار ده كله..

رحت استلمت النضّارة وأنا راجع قعدت أغني..

علشان احنا مع بعضينا..
ولأول مرة لوحدينا..

و قعدت أتخيل النجمة اللي شادية بتقول عليها بتشاور..
وطلعت مني تنهيدة ارتياح..
دلوقتي هأقدر أشوف نجمة شادية وهي بتقرب..

واكتشفت بعد اليومين دول إن كله يهون إلا "فرحة قلبنا وعينينا"!

آه بالمناسبة أنا ما حطيتش صورة للتدوينة دي علشان لسة عاوز أتصور بالنضّارة :)

هأقابله بكرة .. و بعد بكرة!

هأقابله بكرة .. تن تن
وبعد بكرة .. تن تن
والخ الخ!!

اوعوا حد يفهم غلط..
أنا أصلي نظارتي مكسورة!
آه والله زي ما بأقول لك كده..
وبعد ما اتكسرت ...ضاعت!
الكلام ده كان ليلة الوقفة..

فأنا قاعد متبهدل كتير اليومين دول!
أنا شايف عادي جدا الحمد لله،
بس أنا أصلا عاملها علشان الكعبروتر!
فمش عارف أشتغل كويس..

ما علينا،
المهم إني هأستلمها بكرة
إن شاء الله.

نضّارتي بكرة تن تن

وبعد بكرة .. تن تن

بكرة بكرة وبعد بكرة!

محادثة هادفة!

دي صورة عملتها screen capture لـconversation كانت بيني و بين براء..
(اضغط على الصورة للتكبير)
الزمان : 19 نوفمبر 2005
المكان : مكتب عشرينات

فاكر يا براء؟!

نسور في فضاء إقليمي!

أعرف أن النسور تحلق عاليا..

هذا ما تعلمناه في مادة العلوم في المرحلة الابتدائية..
وهذا ما أكدته دروس علم الأحياء في الصف الأول الثانوي..
وأقرته فصول نفس الفرع من العلم عند أصدقائي في الصف الثالث الثانوي (علمي علوم)*...
وللمفارقة فهذا ما لقننا إياه مدرس اللغة العربية في مادة الأدب العربي عندما درسنا قصيدة "النسور"!!
وسمعته في التلفاز وأعرفه من مطالعة شخصية و... و.... و....

المهم أن المعلومة مؤكدة (على الأقل بالنسبة لي)!!

ولكن اليوم – واليوم فقط- هو الأول الذي أدرك فيه أن النسور يمكنها التحليق في الفضاء!
بل وقد تستولي على "قطعة (كون) فضاء" بـ(وضع الجناح)، وتعلنها محمية خاصة بها لها قوانينها التي يضعونها هم!

قام موقع space.com بنشر خبر مفاده أن رئيس الولايات المتحدة الأمريكية George WC (عفوا W Bush) يصر على إتحافنا بكل جديد...

ففي مبادرة هي الأولى من نوعها دوليا قام المذكور أعلاه بإصدار قانون لما أسماه بـ"الفضاء الأمريكي الإقليمي" الذي لا يقل أهمية –من وجهة نظره- عن مياه و أجواء بلاده الإقليمية!!

وأصدر مكتب العلوم والتكنولوجيا التابع لسيادة بوش مباشرة نسخة من الأجزاء المعلنة –حسب ما حرصوا أن يظهروا في كل صفحة بعبارة unclassified- على موقعه على الانترنت،

وتأتي النسخة في 13 بندا تتناول العديد من القضايا بدءا بمقدمة عن خلفية ظهور مثل هذا المفهوم و أهميته، المبادئ التي تم اتباعها و سيتم، أهداف القانون، بحماية الأمن القومي الأمريكي، اقتصاديات الفضاء الأمريكية وحتى الطاقة النووية في الفضاء! بالإضافة بالطبع لبنود أخري يمكنكم مطالعتها في نص القانون.

----
عودة لقصيدة النسور التي درسناها بالصف الثانوي..
لست أذكر نصها،
لكنني أذكر أنها كانت مفاضلة بين نسور اختارت أن تحلق شاهقة..
و أرانب ارتضت جحورا لها مسكنا..
----
ملحوظة : نحن في مصر اتخذنا أيضا النسر شعارا (مع كرهي لهذا الكائن المقيت)، و لكنني أحيي أمريكا لأنها أخذت قدوتها من نسرها في تحليقه عاليا، و نحن أخذنا منه قدوتنا في أكل الجيف، فصار لنسرهم فضاء إقليمي، و أقصى ما نطمح به نحن سد "فضاء" جيوبنا و بطوننا!