علشان احنا مع بعضينا..

علشان احنا مع بعضينا..
ولأول مرة لوحدينا..
والخ الخ!

للمرة التانية اوعوا حد يفهم غلط!
أصلي امبارح كنت بأغني "هأقابله بكرة"!
آه والله زي ما بأقول لكم كده..
وبعد ما غنيتها روحت البيت نمت..
وكان المفروض أستلمها النهاردة..
هي ايه؟
النضّارة يا أخي .. النضّاااااارة..

المهم.. اتصلت بالمحل قال هتيجي الساعة 2..
رحتله الساعة اتنين..

- "لسة ما جاتش، تعالى كمان نص ساعة"!
- "نص ساعة بالظبط؟"
- "أيوة إن شاء الله.. معلش احنا آسفين"

رحت أنا ومحمد تاني بعد نص ساعة صياعة في الرويال بيكري وكوبايتين مشروب عجيب هو اختاره ورغي..
(أصل محمد جي معايا و أنا بأنقيها، و جي يستلمها معايا مشكورا)..

- "اتفضلوا استنوا هي طلعت من المعمل بس لسة في الطريق"!!


قعدنا مستنيين و بعد حوالي كتير من الانتظار محمد جاتله فكرة "نيرة"

- انتوا عندكو خدمة التوصيل للمنازل؟
- لا يا افندم، بس علشان دي غلطتنا احنا ممكن نوصلهالكم
- طيب تمام

اديناهم العنوان و رجعنا المكتب

ساعتين كده و لقيت اتصال على الموبايل :
- الو، أستاذ مصعب معايا
- أيوة يا افندم
- النظارة بتاعت حضرتك خلصت، تحب حضرتك نبعتهالك و للا تيجي تاخدها
- لا لا أنا جاي

بيني وبينكم أصل الساعي عندهم كان عجوز شوية، فما رضيتش أخليه ييجي المشوار ده كله..

رحت استلمت النضّارة وأنا راجع قعدت أغني..

علشان احنا مع بعضينا..
ولأول مرة لوحدينا..

و قعدت أتخيل النجمة اللي شادية بتقول عليها بتشاور..
وطلعت مني تنهيدة ارتياح..
دلوقتي هأقدر أشوف نجمة شادية وهي بتقرب..

واكتشفت بعد اليومين دول إن كله يهون إلا "فرحة قلبنا وعينينا"!

آه بالمناسبة أنا ما حطيتش صورة للتدوينة دي علشان لسة عاوز أتصور بالنضّارة :)