الخميس، أغسطس 30، 2007

توم آند جيري بالهندي!!




أصابني نوع من الحنين للكارتون اللي كنت بأشوفه وأنا صغير فدخلت أخدت جولة في يوتيوب ..

كابتن ماجد.. ما كنتش بأحبه بس كان الأوبشن الوحيد المتاح أمام طفل في سني.. وكانوا بيقطعوه علشان النشرة أو البرنامج اللي
بعدها

السنافر، كعبول، ساندي بيل، بيل وسيباستيان، سلاحف النينجا، سانبي، لحن الحياة، الماسة الزرقاء، النمر المقنع، الرمية الملتهبة، كابتن رابح، المقنع، الصياد الصغير، جريندايزر، مازينجر

وغيرهم كتييييييييييييير

بس عمري ما تخيلت إني في يوم من الأيام هأشوف توم آند جيري هندي!

اتفرجوا

الأربعاء، أغسطس 22، 2007

كل سنة وأنت ..


"كل سنة وأنت
يا راجل يا أنت"

فاكر لما كنا بنقعد رايقين ما وراناش حاجة في الدنيا غير إن كل واحد يفتكس افتكاسة ونقعد نغنيها.. زي الحتة اللي فوق دي.. عارف كل ما بأفتكرها مش عارف ليه بأفتكر :

"يا واش يا واش يا مرجيحة
ما تهزيهاش يا مرجيحة"

مش مصدق إن أنت بقيت عجوز وكركبت وبقى عندك اتنين وعشرين سنة
ولسة لما أنس الصغنتوت ييجي ويحسسك إنك كبرت أكتر وأكتر.. :P

حصل فيهم كتير أوي أوي


بس عارف.. أنا فخور بيك
وبأحبك


بيرو

"كل سنة وأنت..
يا راجل يا أنت"

الأحد، أغسطس 19، 2007

والله ساعات بأنسى!


وجه غاضب باحمرار وعصا مرتفعة تتحين الفرصة للانقضاض وصوت جهوري يدوي :

"ازاي نسيت تحل الواجب؟!
نسيت تاكل؟!
نسيت تشرب؟!
نسيت تروح الحمام؟!!”

ليه لما كنت ساعات بأجاوب "أيوة"
يقولوا لي "أنت كداب"؟!

الأربعاء، أغسطس 15، 2007

عمر أفندي باشا :)


عمر أفندي باشا.. كل سنة وأنت طيب
وخللي بالك من بابا باسم.. علشان هو بيحبك أوي

عارف يا باسم .. أنت فكرتني بالرسول صلى الله عليه وسلم لما رزق بإبراهيم.. كان من حبه له يأخذه ويمر على بيوت الصحابة ويطرق الباب ويقول لهم هذا إبراهيم هذا ابني بمنتهى الحب..

ربنا يبارك فيه ويحفظه يا رب ..

الأحد، أغسطس 12، 2007

النهاردة اجتماع!

النهاردة كان عندي اجتماع طويل أوي جدا موت خالص في الشغل

يا جماعة أنا مفهومي عن أيام الأسبوع اتغير..

السبت، الاجتماع، الاثنين، الثلاثاء، الأربعاء، الخميس، الجمعة !!