الثلاثاء، أبريل 24، 2007

بسلامته بيخطب (4)



قبل ما أكتب وأعترف،
بيرو حبيبي..
دودو مرات حبيبي ..

أنا عارف إني اتأخرت في كتابتها بس والله غصب عني، وأنا كمان كنت ناوي أقفل المدونة فترة لأني مفحوت اليومين دول، وأفتحها تاني لما أفضى، بس انتوا اللي خليتوني ما أعملش كده علشان أكتب التدوينة دي ..


براء كان كتب زمان موضوع اسمه "بسلامته بيخطب" عن خطبة للسيد المواطن بسلامته الريس عطل فيها شوارع القاهرة المقهورة، وبعدها جت خطوبة المواطن بسلامته جيمي حصب الله مبارك فبيرو كتب "بسلامته بيخطب (2)"، وبعد كده بيرو بذات نفسيه خطب فكتبت أنا "بسلامته بيخطب (3)"

اقرأوهم و ارجعوا اقرأوا دي
-----

ياااااااااه يا بيرو..
فاكر زمان لما قلت لك “ما تقلقش .. والله هتتجوز دعاء”؟
فاكر من سنة بالظبط قعدتنا على قهوة المهدي و أنت بتقول لي “تفتكر أقول لها مميزاتي ايه؟” وأنا قلت لك “تخين وبنظارة؟”

عارف واحنا راجعين من كفر الشيخ يوم الفرح أنا بصيت من الشباك وعدى قدام عيني شريط ذكرياتنا كله

أول يوم شفتك فيه
الفترة اللي قعدتها أنا وإخواتي عندكم بعد وفاة أمي الله يرحمها
قعدتك مع بابا في ثانوي
درس الفيزيا اللي حضرناه سوا في أولى ثانوي
المسرحيات والقصايد اللي كنت بتكتبها
الساحل الشمالي
الكشافة
مشوار بهتيم
هاجر للسياحة ونصر الدين الخاصة
دار اللواء
أول عربية فول كلنا عليها سوا
الأزهر بارك
فكرة
موقع عصافير، فاكره؟ لسة الورق معايا
بدايتك مع عشرينات
سفرنا لباكستان اللي ما تمش
رحلتنا سوا لقنا
مشاوير الهدوم من وسط البلد
معسكرات إسكندرية ومرسى مطروح

يااااه يا براء، كانت حاجات حلوة أوي..
بس الوقت عدى بسرعة
وبقالك حامل أسرار غيري :) وشريك حياة تاني
خللي بالك منه أوي يا دعاء..
ما كنتش هأسيبه لأي حد، بس أنا عارف إنه في عينيكي


أنا كنت فرحان أوي يا بيرو وأنا في كواليس الاحداث
لحظات التوتر والشد الكتير اللي حصلت
كنت فرحان واحنا نازلين بنشتري آخر حاجاتك،
واحنا رايحين كفر الشيخ،
واحنا بنزين حوض السمك،
واحنا بنوضب الشقة

وأنت بتلبس البدلة أنا كنت عاوز أبكي أوي من الفرحة

كنت فرحان أوي وأنا بأصور لحظات سعادتك دي
وكنت فرحان لأني كان نفسي نفرح بيكم بقى أوي

عارف كنت فرحان زي ما يكون فرحي أنا تمام


دلوقتي أنا منتظر بفارغ الصبر المشهد ده :

براء بيكلمني الساعة 12 بالليل:

- مصعب الحقني، مراتي بتولد
- حاضر أنا جايلك حالا
وأروحله وأفضل معاه طول الليل أهديه ومراته جو، ويوصل النونو لعالمنا مع شروق الشمس ونسمع أحلى "واء واء"، وبراء يبصلي ويبقى عاوز يتكلم بس مش عارف يقول حاجة ونجري سوا على جوا..

يشوف النونو جنب مامته فيقف فجأة مكانه ويبصلهم وهو متأثر أوي، ودعاء بتضحك وبتقول له شيل ابنك أو بنتك وهو خايف فأروح أنا أشيله وأديه لبراء بالعافية فيبصله ويبصلي وهو لسة مش مصدق، فأقول له "بوس ابنك" فيبوسه وتنزل أول دمعة من ساعة ما شافه وأنا ودعاء نقعد نضحك...


أنا مش عارف أقول ايه تاني..
بس جوايا محيط كامل من الفرحة ليكم انتوا الاتنين
ومحيط زيه من الدعوات إن ربنا يوفقكم

وآسف مرة تانية على التأخير

----
تمت أو هكذا يهيأ لي..

هناك 27 تعليقًا:

اميرة هشام يقول...

مش انت لوحدك يامصعب اللي فرحانلهم

كلنا كلنا كنا فرحانييييييييييين اوييييييييي

بجد يوم الفرح بتاعهم ده بيمثلي شلال من الزكريات

واول فرحة لينا
انا مشيت وانا مستنية الفرحة اللي بعديها

يارب يجعل كل ايامنا سعادة وهنا

Angel يقول...

اولا مبرووووووك لبراء ودعاء

ويارب تدوم المحبه والصداقه اللي بينكم
مصعب
احساسك حلو وروحك احلى ^^

دينا فهمي يقول...

بسم الله ما شاء الله
ربنا يبارك لهم يا رب
وعقبالك يا مصعب

بجد تعبيرك حلو أوي

Lens Geek يقول...

الله،هيه دي الصداقة كل كلمه قلتها اثرت في اوي فعلا شريط الذكريات بيطول كل ما عمر الانسان بيطول ! المهم ربنا يكرمك و تعملها زي ما براء عملها و انا اكتبلك حتت تتدوينه تهز البلجسفير * كلها ان شاء الله

* Blog sphere

LAMIA MAHMOUD يقول...

سيبك انت احلى حاجة في البوست انه باين فيه نقاء مشاعرك وقد ايه انت حد بيحب اصحابه اوي

ربنا يخليلك اصحابك ويخليك ليهم

Mony The Angel يقول...

ana lamma ereet al post kan there's no comments
bas 3alabaal ma 7'alast w lafeet laffet om al3aroosa
gete l2eet al commentata ad kda :D
yalla msh 7'sara felpost 3shan a2raah 3ala fehm :))

bas ma2oltelnaash al nono esmo/aha eh ;) ??

غير معرف يقول...

الف مبروك لهذا الزواج المبارك والخلف الصالح بارا بوالديه ، لقد اعجبتنى هذه الاسره الصغيره الودوده فلقد ذكرتنى بمشاعرى تجاه اصدقاء عمرى الذين افتفدهم كثيرا وعقبال ما صاحبك يقف لك فى زواجك ان شاء الله
نيره عصام عبد المحسن

حلم الحرية يقول...

تمت أو هكذا يهيأ لي..
ــــــــــــــــــ

لا يا مصعب
الكلمة الصح مش تمت ...لا..بدات
حياة جديدة بدات
اسرة جديدة ودنيا جديدة بدات

ربنا يرزقهم السعادة ويظلل حياتهم بالحب دايما
ويخليك لصاحبك وتفضل معاه ..مش لحد مراتي بتولد.. لا لغاية انا نازل اخطب لابني تعالي معايا يا مصعب ما انت عمه

غير معرف يقول...

السلام عليكم و رحمة الله و بركاته
تصدق انا فيا حاجة لله
يا خلاسي على حلاوتكو.. و ربنا انتوا عيال عسل .. مش عارفة و الله اقول ايه لان وشي فلّق من الابتسامة الغبية اللي معلقة من ساعة ما بدأت اقرا البوست
المهم ربنا يخليكوا لبعض و يديم عليكوا المحبه و الوفاق و.. مش عارفة ..بس ربنا عارف النيه و هايستجيب ان شاء الله
احلى حاجة ان انا اخر واحدة علقت على البوست اللي فات-امبارح-و كنت طالبه لما ادخل تاني الاقي بوست جديد .... و فعلا لقيت -النهارده-... ربنا يكرمك يا مصعب يا رب يا رب يا رب

the wall

Salma Amer يقول...

الف الف مبروك لدودو وبيرو يارب يسعدكم ويهنيكم ببعض لانكم فعلا ناس تستهلوا كل الخير اللي في الدنيا وانا اتبسطت جدا أني اتعرفت عليهم الفترة اللي فاتت . وانت كمان يا مصعب ألف مبروك وعقبال لما تشوف أحفدهم مش اولادهم بس زي ما حلمت.

قضية عم أحمد Ahmed Case يقول...

مصعب الحبوب
بصراحة البوست اللي انت كاتبه ده خاص اوي وحساس اوي وتقريبا محدش هيعرف يعلق كويس ويفهم اوي غير براء .
انصحك حبيبي نصيحتي الدائمة
ان في هذا الكون اناس لا يمرون في حياتنا الا مرة واحدة فاذا وجدتهمفحافظ عليهم لانهم اذا ذهبوا لن يعودوا مرة اخرى فهم لا يمرون في العمر الا مرة .

ربنا يحفظكم لبعض ويجعل حبكم فب الله

الحلم العربي يقول...

بسلامته بيخطب....كانت مقالة جميلة ...أنا فاكراها لغاية دلوقتى كانت حاجة كده على شكل سيناريو بس كان كوميدي جدا ..انا يومها خليت عيلتى كلها تقراها...
أما بقى عن مشاعرك الجميلة الواحد ما يقدرش يقول غير ربنا يخليكوا لبعض و يبعد عنكوا العين و يديم المودة بينكوا و محدش فيكوا يتغير أبدا من ناحية التانى مهما عملت فيه الدنيا...ربنا يوفقكو...و ما تتأخرش علينا تانى في التدوين مهما كنت مشغول احنا بننتظر تدويناتك بفارغ الصبر

قضية عم أحمد Ahmed Case يقول...

على فكرة يا مصعب
انت من اطيب واجدع الناس اللى شفتهم

ربنا يحفظك اوي

marwa salah يقول...

الف مبروك يا مصعب لصاحبك وعقبال ما يفرح بيك هو كمان وربنا يخليكم لبعض

ام مليكة يقول...

مصاعيبوووووووووووووووومرسي يا مصعب الخير والجمال والحب والامل عارف يا مصعب انت فاكر لما انا كنت باقول امنيتي فاكرها ولا نسيت "اني اخلف ولد مؤدب زي مصعب بس يكون شبه بيرو " بجد مش هزار انا لسه بتمنى كده وبيرو مزعلش خالص لانه فاهم انا ليه باقول كده انا حاسه اني خطفت صاحبك منك وفضل الاحساس ده مسيطر علي لفترة طويلة بس دلوقتي مش حاسه كده حاسه انكم كسبتوا صديقة جديدة هي انا مرسي يا مصاعيبو وبعدين تخيلت انك هاتجيب سيرة البسلة والمكرونة البشامل وانت ولا الهوا ماشي يا عمنا ربنا يخلي لك صاحب ونفرح بيك

البراء أشرف يقول...

لالالالالالا بجد..

هو أنا مفروض أرد على الكلام ده..

يا نهار يا نهار..

لا يا عم.. الصلح خير!

أنت أكيد تقصد حد تاني غيري..

صح يا رفعت.. هو يمكن يقصدك أنت.. أنتوا أصحاب حقيقيين قوي، وقريبيين من بعض الفترة اللي فاتت، يمكن يقصد حد من أصدقاء طفولت..

مش عارف..
على قد ما أنا فرحان، على قد ما أنا بشك إنها مكتوبة عشاني..

يمكن عشان بلوم نفسي شوية إننا مش عارفين نلاقي وقت نقعد فيه مع بعض الفترة اللي فاتت..

مش عارف يا مصعب.

أنا مش عارف أكتب بصراحة

متلخبط

الله يسامحك
ويكرمك
ويزيدك حب الناس ليك وحبك للناس
ويكرمك ببنت حلال مصفي
وبعيال كتير كتير كتير
وتشتغل في جوجل
لأ
تشتري جوجل
وتستلف مني شوية فلوس تكمل بيهم على اللي معاك وتشتري جوجل
وتضم جوجل لعشرينات ويبقى اللينك بتاعه :

google.20at.com

مصعب



أنا بحبك

ola salem يقول...

هههههههههه
والله يا مصعب انت حته سكره
الف مبروك لبيرو طبعا ودعاء السكرة
الاتنين اطيب من بعض الصراحة
نا معرفتى بيهم مش قوية جدا بس بخترمهم جدا عشان يستاهلوا بجد
وحكاية العيال دى ربنا يكرم فيها
ههههههههه
انا كل اللى كان شاغلنى ساعة اما براء قالى فرحى يوم الجمعة انه كان هيتجوز قبل الصلاة ولا بعدها
ولما سألته افتكرنى بهزر وقعد يهزر هو كمان
الف الف الف مليون مبروك يا بيرو انت ودعاء وعقبال ما نشوفك كده رايح توصل عيالك عالمدرسة

علا

NeRmeeN يقول...

احم احم...بص يا مصعب ..انا عارفة ان يمكن دى اول مرة اعلق فيها عندك ...لكن انا متابعة البلوج بتاعك من مدة...ومع الاسف كل مرة معرفش اعلق على اللى انت كاتبه ..معرفش ليه!!بحس ان معنديش حاجة اقولها..يمكن عشان معظم الحاجات اللى انت بتكتبها هنا فى البلوج بتاعك خاصة بيك انت وصحابك لكن معرفش ليه كلامك بيأثر فيا اوى ..بحس ان الدنيا لسه بخير ..اينعم انا مؤمنة بالنظرية اللى بتقول مفيش حد عدل دلوقتى ومفيش حد يستاهل اصلا ان حد يحرق نفسه عشان التانى.. بس انت بوظتلى نظريتى دى يا عم مصعب
تحياتى ليك

غير معرف يقول...

that's was so so sweet masha Allah

Rabena yekremak ya Rab..w 3o2balak

for Baraa and Doa'a.... mabroook ya shabab :))

elkamhawi يقول...

ربنا يخليكو لبعض

Amira Hassan يقول...

مش عارفه اقولك بجد غير انك جميل اووووووووووي يا مصعب

ربنا يديك على اد نيتك الصافية دي

و الف مبروك لدعاء و براء

أميرة من غير قصر ولا بستان.. ولا الشاطر حسن كمان يقول...

ربنا يكرمهم يارب
انا عرفت براء بس للأسف متعرفتش بدعاء خالص بس انا واثقه انها هى كمان انسانه طيبه و جميله
و ربنا يخليهم لبعض و يخليك ل براء يا مصعب و نفرح بيك قريب :):):)

Abd El Rahman Magdy يقول...

كان نفسي اكون موجود ساعة الفرح
يللا الحمد لله
على العموم ألف مبروك لبراء
وربنا يخليهم لبعض
وربنا يخليك انت وبراء لبعض

دعاء عادل يقول...

ايه ده يا مصعب انا مش عارفه اقول ايه..البوست حلو اوى.. بجد مشاعرك حلوه وحقيقيه اوووووووى
انت انسان جميل جداوربنا يخليكو لبعض وتزيد الذكريات اللى بينكوا اكتر
متخيلاكو بعد اربعين سنه كده وانتوا قاعدين مع اولادكوا واحفادكوا بتحكوا ليهم عن الايام دى والايام اللى جاية انشاء الله وتكون فيه ذكريات حلوه كتير
ربنا يسعدك يارب يابراء انت ودعاء بجد فرحنا بيكم اوى ودى اول مره على فكرة حد من اصحابى يتجوز واحضر فرحه وكده يعنى بيرو ودودو هما اول فرحتى (:
بس يا مصعب لسه لم تتم بعد انشاء الله براء يكتب بسلامته بيخطب 5
وتكون انت اللى بتخطب المرة دى ربنا يوفقك يارب ونفرح بيك انت كمان
و تكملوا بقى الذكريات اللى ها تحكوها الى اولادكم ربنا يوفقكم بجد انا بحبكم كلكم اووووووووووووى

AbdElRaHmaN Ayyash يقول...

ياااه يا مصعب
:) ده كله يابني
ربنا يحميكم ويخلليكم ويخلليهم لبعض
ان شاء الله اليوم اللي انت مستنيه هييجي بسرعه
تعرف أحسن حاجه فيكم ايه
انك مصعب
وهو براء
:) وأحسن حاجه فيك انت ايه
انك فاكر كل اللحظات دي في زمن محدش بيفتكر فيه حاجه
:) وتعرف أحلى حاجه في براء ايه
انه تخين وبنضاره
وتعرف أحسن حاجه دعاء ايه
انها بقت مدام بيرو
ربنا يخلليكم كووووولكم
:)سلام يا حبي

غير معرف يقول...

انا عبرتك يامصعب ..اخبارك ايه ..المقالة حلوة قوي قوي .. وعقبالك ..انا محمد عبد اللطيف قابلتك في حفلة وجيه عزيز وسالتك اجيب الاغاني بتاعته من فين .. فاكر
بص ياسيدي البراء اداني دفعة كده علشان اكتب مدونة .. وانا بدات مع مجموعة من صحابي في كتابةمدونة اسمها الصيف الهندي
اتمنى انك تخش على المدونة وتقوللي رايك
اللينك اهه
http://elsaifelhendy.blogspot.com/

Oma يقول...

بحب اوي الناس دي
لما بشوف اتنين زيكو كده بحس الدنيا لسا جميله اوي وبحس اني عايزه ادحك كتيير عشان فيه ناس جميله كده
بجد حاله زيكو بتديني امل وبتنورلي الدنيا
ربنا مايحرمكو من بعض ابداً
ويفضل اللي بينكو يزيد دايماً