علشان احنا مع بعضينا..

علشان احنا مع بعضينا..
ولأول مرة لوحدينا..
والخ الخ!

للمرة التانية اوعوا حد يفهم غلط!
أصلي امبارح كنت بأغني "هأقابله بكرة"!
آه والله زي ما بأقول لكم كده..
وبعد ما غنيتها روحت البيت نمت..
وكان المفروض أستلمها النهاردة..
هي ايه؟
النضّارة يا أخي .. النضّاااااارة..

المهم.. اتصلت بالمحل قال هتيجي الساعة 2..
رحتله الساعة اتنين..

- "لسة ما جاتش، تعالى كمان نص ساعة"!
- "نص ساعة بالظبط؟"
- "أيوة إن شاء الله.. معلش احنا آسفين"

رحت أنا ومحمد تاني بعد نص ساعة صياعة في الرويال بيكري وكوبايتين مشروب عجيب هو اختاره ورغي..
(أصل محمد جي معايا و أنا بأنقيها، و جي يستلمها معايا مشكورا)..

- "اتفضلوا استنوا هي طلعت من المعمل بس لسة في الطريق"!!


قعدنا مستنيين و بعد حوالي كتير من الانتظار محمد جاتله فكرة "نيرة"

- انتوا عندكو خدمة التوصيل للمنازل؟
- لا يا افندم، بس علشان دي غلطتنا احنا ممكن نوصلهالكم
- طيب تمام

اديناهم العنوان و رجعنا المكتب

ساعتين كده و لقيت اتصال على الموبايل :
- الو، أستاذ مصعب معايا
- أيوة يا افندم
- النظارة بتاعت حضرتك خلصت، تحب حضرتك نبعتهالك و للا تيجي تاخدها
- لا لا أنا جاي

بيني وبينكم أصل الساعي عندهم كان عجوز شوية، فما رضيتش أخليه ييجي المشوار ده كله..

رحت استلمت النضّارة وأنا راجع قعدت أغني..

علشان احنا مع بعضينا..
ولأول مرة لوحدينا..

و قعدت أتخيل النجمة اللي شادية بتقول عليها بتشاور..
وطلعت مني تنهيدة ارتياح..
دلوقتي هأقدر أشوف نجمة شادية وهي بتقرب..

واكتشفت بعد اليومين دول إن كله يهون إلا "فرحة قلبنا وعينينا"!

آه بالمناسبة أنا ما حطيتش صورة للتدوينة دي علشان لسة عاوز أتصور بالنضّارة :)

بحبك قد أحزاني

لقيت الرباعيات دي في مدونة أنا حر

و عاجباني أوي أوي

أكتر واحدة حاسس بيها :

"بحبك قد أحزاني

يا ريشتى وكل ألوانى

صبرى على التكشيرة

منايا ساعة الحيرة

اسمى ورسمى وعنوانى"

زوروا المدونة تجدوا ما يسركم :)

هأقابله بكرة .. و بعد بكرة!

هأقابله بكرة .. تن تن
وبعد بكرة .. تن تن
والخ الخ!!

اوعوا حد يفهم غلط..
أنا أصلي نظارتي مكسورة!
آه والله زي ما بأقول لك كده..
وبعد ما اتكسرت ...ضاعت!
الكلام ده كان ليلة الوقفة..

فأنا قاعد متبهدل كتير اليومين دول!
أنا شايف عادي جدا الحمد لله،
بس أنا أصلا عاملها علشان الكعبروتر!
فمش عارف أشتغل كويس..

ما علينا،
المهم إني هأستلمها بكرة
إن شاء الله.

نضّارتي بكرة تن تن

وبعد بكرة .. تن تن

بكرة بكرة وبعد بكرة!

عذرا.. بعض الحقوق محفوظة!!

ربما لاحظتم ظهور الصورة على اليسار في الـfooter الخاص بمدونتي..
وربما ليست هذه الصفحة من الأهمية بمكان بالنسبة لك لتلاحظها!

عل كلٍ، منذ فترة وأنا أبحث عن ترخيص أنشر تحته تدويناتي، ولسبب أو لآخر كنت أصاب بالكسل، أو لا أجد وقتا كافيا لقراءة كافة تفاصيل التراخيص المتاحة..

ومنذ فترة أيضا وجدت موقع creative commons الذي تخصص بتقديم ترخيص ملائم للمواد الصوتية و المرئية و الصور و الكتابات و ما يخص التعليم، إلا أنني لنفس السبب المذكور في الفقرة السابقة أتكاسل..

واليوم قررت بعد قراءة مفصلة للرخصة الجديدة أن تكون مدونتي و كل ما بها خاضعا لها..

لكن اختصارا .. هذا مجمل الـlicense الجديدة :

"أنت حر في أن :

1) أن تنسخ، توزع أو تعيد استخدام محتوى هذه المدونة.
2) أن تشتق من محتوى هذه المدونة أعمالا أخرى

ولكن فقط لك الحق في ذلك في حال اتباعك الشروط التالية:

1) لابد من ذكر المصدر (مدونتي) ووضع رابط لها.
2) أن لا يتم استخدام هذا المحتوى استخداما تجاريا.
3) أي منتج مبني أو مشتق من محتوى هذه المدونة لابد و أن يخضع لنفس الترخيص (license) الخاضعة له هذه المدونة.

مع ملاحظة أن:

- في حالة الاستخدام أو التوزيع لابد من توضيح شروط الترخيص الخاضع لها العمل للآخرين.
- أي من هذه الشروط يمكن تعديله إذا تم الاتفاق مع صاحب المدونة (اللي هو أنا)"..

باختصار كما هو مكتوب في آخر الصفحة "بعض حقوق النشر و الغسيل و المشابك محفوظة و متنشفة"!

خلص خلاص..

خلص خلاص..
ومشي..
ومش هييجي إلا كمان سنة..
يا عالم هنكون ساعتها فين..

كان مصبرني كتير..
أوي..
كان مليان سكينة..
وهدوء..
ووحدة..
والأهم..
إنه الوحيد اليومين دول
مصدر قوتي..
ومواساتي..

يا أجمل شهر اتوجد..
من دلوقتي وحشتني..

مش عارف ازاي أقول لكم "كل سنة و أنت طيبين"..
مش حاسس بيها..
ما كنتش عاوز اليوم ده ييجي..

بس ده حقكم علي..
كل سنة و أنتم طيبين..

محادثة هادفة!

دي صورة عملتها screen capture لـconversation كانت بيني و بين براء..
(اضغط على الصورة للتكبير)
الزمان : 19 نوفمبر 2005
المكان : مكتب عشرينات

فاكر يا براء؟!

سلام يا "صحبي"

دفعتي حبيبتي ce2008..
سلام..
أيوة بكل فخر دفعتي..
وأيوة للأسف سلام..
النهاردة كان آخر ورقة رسمية تربطني بهندسة..
وبداية عهدي (رسميا برضه) في تجارة..

إنك "تفقد" شخص أو شيء بيبقى صعب جدا..
لكن الأكثر إيلاما إنك "تفتقده"، وإنه يوحشك..
الشخص ده هو أنتم كلكم..
والشيء هو كل لحظة قضيتها في القسم ده..
مع الصحبة دي..
لو فضلت أعدد أسماء الناس مش هأخلص..
و هأبقى نسيت حد..
علشان كده بأسلم عليكم كلكم..
من أولكم لآخركم..

و من كل قلبي "والله هتوحشوني"..
هتوحشني المجموعة بتاعت الياهو..اللي اتقسمت مجموعات
هيوحشني المنتدى اللي كل شوية يقع ويقوم..
هيوحشني جو المشاريع وضغطتها..
ومناقشتكم لجدول الامتحانات..
هيوحشني عيد الميلاد اللي أصحابي عملوه لي مفاجأة..
وهتوحشني حاجات كتير أوي..
لا تعي هذه السطور حصرها..

هأفتقد وشوش بريئة..
وابتسامات طاهرة..
وعقول منورة..
وقلوب دافية وصافية..

أرجوكم لو حد زعلان مني في حاجة،
أي حاجة .. مهما كانت صغيرة
يا إما يسامحني..
يا إما يقول لي أعمل ايه علشان أصالحه..
لأني بجد ما أقدرش على زعلكم..
وأنا أشهد الله إني لو كنت شايل من أي حد فيكم في يوم من الأيام أي حاجة..
إني سامحته..

أنا هأعدي إن شاء الله باستمرار..
لو ما كانش عندكم مانع طبعا.. 

لو ما قدرتش....

براء.. أشكرك على كل كلمة وقفت بيها جنبي..
اللي منهم الكلمات دي،
و اللي دورت عليها لغاية أما لقيتها مكتوبة في مدونة (عايشة و خلاص)

الكلمات بتقول لي :

"إن ما قدرتش تضحك
ما تدمّعش ولا تبكيش..
وإن ما فضلش معاك غير قلبك
إوعى تخاف !!
مش هتموت ... هتعيش
وإن سألوك الناس ..
عن ضي جو عيونك ما بيلمعش
ما تخبيش..
قول لهم العيب مش فيا
ده العيب م الضي !!
وأنا مش عاشق ضلمة
ولا زعّلت الضي
مسير الضي لوحده .. هيلمع
ومسير الضحك لوحده هيرجع
ما بيجرحش ولا يؤذيـش

كلمات : محمد الناصر
غناء : وجيه عزيز"

أحمد ندا .. شكرا :)

أحمد ندا باشا..
أشكرك بشدة على القلم.. اللي سمحت لي "أقلبه منك"!
بجد أنا حبيته جدا، و بأشكرك حتى تستغيث..

للي ما يعرفش..
احنا كنا كلنا في خروجة أول امبارح (براء، أحمد الدريني، أحمد ندا ودعاء)..
فشفت القلم مع أحمد ندا.. عجبني جدا فقلت له هاته!!

سلام، ورايا حاجات أكتبها :)

KDE .. كل سنة و أنت طيب

امبارح كان عيد ميلاد KDE العاشر...
كل سنة و هو طيب

للي ما يعرفش KDE هو أحد أشهر اتنين GUI envirnoment للينوكس، (بيئة تشغيل، أو واجهة سطح المكتب)
بالإضافة طبعا لـGNOME

لكن أنا شخصيا بأفضل KDE، و مشغل نسخة slackware اللي منزلها على الجهاز عندي عليه..

دي صور من الحفلة اللي اتعملت امبارح في معهد TAE في أوستفيلدرن القريبة من المدينة شتوتجارت بألمانيا

نسور في فضاء إقليمي!

أعرف أن النسور تحلق عاليا..

هذا ما تعلمناه في مادة العلوم في المرحلة الابتدائية..
وهذا ما أكدته دروس علم الأحياء في الصف الأول الثانوي..
وأقرته فصول نفس الفرع من العلم عند أصدقائي في الصف الثالث الثانوي (علمي علوم)*...
وللمفارقة فهذا ما لقننا إياه مدرس اللغة العربية في مادة الأدب العربي عندما درسنا قصيدة "النسور"!!
وسمعته في التلفاز وأعرفه من مطالعة شخصية و... و.... و....

المهم أن المعلومة مؤكدة (على الأقل بالنسبة لي)!!

ولكن اليوم – واليوم فقط- هو الأول الذي أدرك فيه أن النسور يمكنها التحليق في الفضاء!
بل وقد تستولي على "قطعة (كون) فضاء" بـ(وضع الجناح)، وتعلنها محمية خاصة بها لها قوانينها التي يضعونها هم!

قام موقع space.com بنشر خبر مفاده أن رئيس الولايات المتحدة الأمريكية George WC (عفوا W Bush) يصر على إتحافنا بكل جديد...

ففي مبادرة هي الأولى من نوعها دوليا قام المذكور أعلاه بإصدار قانون لما أسماه بـ"الفضاء الأمريكي الإقليمي" الذي لا يقل أهمية –من وجهة نظره- عن مياه و أجواء بلاده الإقليمية!!

وأصدر مكتب العلوم والتكنولوجيا التابع لسيادة بوش مباشرة نسخة من الأجزاء المعلنة –حسب ما حرصوا أن يظهروا في كل صفحة بعبارة unclassified- على موقعه على الانترنت،

وتأتي النسخة في 13 بندا تتناول العديد من القضايا بدءا بمقدمة عن خلفية ظهور مثل هذا المفهوم و أهميته، المبادئ التي تم اتباعها و سيتم، أهداف القانون، بحماية الأمن القومي الأمريكي، اقتصاديات الفضاء الأمريكية وحتى الطاقة النووية في الفضاء! بالإضافة بالطبع لبنود أخري يمكنكم مطالعتها في نص القانون.

----
عودة لقصيدة النسور التي درسناها بالصف الثانوي..
لست أذكر نصها،
لكنني أذكر أنها كانت مفاضلة بين نسور اختارت أن تحلق شاهقة..
و أرانب ارتضت جحورا لها مسكنا..
----
ملحوظة : نحن في مصر اتخذنا أيضا النسر شعارا (مع كرهي لهذا الكائن المقيت)، و لكنني أحيي أمريكا لأنها أخذت قدوتها من نسرها في تحليقه عاليا، و نحن أخذنا منه قدوتنا في أكل الجيف، فصار لنسرهم فضاء إقليمي، و أقصى ما نطمح به نحن سد "فضاء" جيوبنا و بطوننا!

اوعي تطيري يا عصفورة!

على مدونة "شناير" الألماني (مهتم بالـsecurity( وجدت تدوينة رائعة جمع فيها بعض صور الكاريكاتير التي تناولت ما آل إليه حال المطارات في بريطانيا..

و الطريف أن المعلقين أضافوا لهذا التدوينة صورا أخرى تضاهيها روعة ، بل تكاد تسبقها في بعض الأحيان..