الاثنين، أبريل 24، 2006

اضحك .. الصورة تطلع حلوة


اضحك الصورة تطلع حلوة ..
اضحك ..
اضحك و لو جواك ألف جرح ..
ما يهمكش ..
برضه الصورة هتطلع حلوة ..
اضحك ..
يمكن في يوم تشوف نفسك في المراية ..
تصدق .. فتضحك ..
تضحك من قلبك .. أو عليه..
أو الاتنين مع بعض..
مش فارقة كتير..
المهم إنك ضحكت و إن الصورة هتطلع حلوة..
اضحك ..
ما تخليش حد يقولهالك..
لما يشوفوا صورة مهزوزة وحشة..
و يتكلموا و يعيدوا و يزيدوا ..
و في الآخر يقولوا لك ..
"علشان الصورة تطلع حلوة .. اضحك.."
و ما حدش فيهم أبدا فاهمك..
فاضحك من نفسك..
أصله علشان تحافظ عليك منهم..
الصورة يا إما تختفي..
يا إما تطلع حلوة..

هناك تعليقان (2):

غير معرف يقول...

المشكله ان مفيش حاجه تتضحك لا بره ولا جوةلو بصيت لنفسك حتلاقى حاله ميسرش لا علاقتك مع ربنا كويسه ولا مع نفسك كويسه ومش هتلاقى نفسك اديت اللى عليك فى كل حاجه يعنى من الاخر لو قعدت وفكرت مش هتلاقى نفسك راضى عن نفسك ...
ولو بصيت بره هتلاقى البلد حالها زفت )(سورى فى الكلمه)
موت واعتصامات واعتقلات وخراب فى كل مكان
....
معلش كان نفسى اقلك اخبار احسن من كده بس مش لاقيه

بس كويسه انك لسه متفائل بعد دا كله دا غير اللى انا مقلتوش !!!!!
يلا بقى اضحك علشان الصورة تطلع حلوة

العـابــــــــره يقول...

معاك إن الدنيا فيها حاجات كتير بتبكينا، لكن ده ميمنعش إن فيها حاجات بتضحكنا،بلاش ننظرللجانب المظلم
بمناسبه الصور،تخيل نفسك فى رحله ومعاك كاميرا،وصورت واتصورت مع أصحابك،وروحت علشان تحمض الفيلم.......أكتشفت إن الكاميرامفهاش فيلم اصلا ..هتعمل إيه!!أفتكر غضبك مش هيفيد ، أهااا هتضحك فى اللحظه دى هقولك بوصلى علشان الصوره تطلع حلوه...