الأحد، أغسطس 03، 2008

مبعثرة!


تحذير هام جدا : خواطر متفرقة جدا لشاب كان نايم في الميكروباص وهو رايح الشغل ..
---------------

-1-

بالأمس كنت ذاهبا إلى العمل، وفي الطريق غفوت قليلا لأستيقظ على الآية :

“وإما ترين من البشر أحدا فقولي إني نذرت للرحمن صوما فلن أكلم اليوم إنسيا"

رغم أنني أعلم أنه أمر إلهي، ورغم أنني أسمعها كثيرا، إلا أنني اليوم فقط تخيلتني مكانها والناس أمامي يتهمونني في شرفي ولا ظهر لي يدافع عني أمام كل هؤلاء القوم إلا طفل رضيع لم يكمل شهورا بعد،

وفوق كل هذا لا أنطق حرفا دفاعا عن نفسي لأن ربي أمرني أن أصوم صمتا!

سيدتي مريم..
لو كان يجوز الانحناء لغير الله لانحنيت لك احتراما..

سبحانك ربي ما أعظمك..

-2-

نمت وصحيت تاني لقيت شاب بيرمي لي ورقة إعلانات من الشباك -عادي يعني-، إلا إن الورقة طلعت للمطعم الشهير "حضرموت"..

دار على طول في بالي كمية مطاعم حضرموت اللي مرمية في كل حتة في البلد، شارع فيصل -اللي كتير بأروح منه- مثلا بين كل حضر موت والتاني فرعين ليه وحارة!

وقعدت أدور على تفسير لاستمراره في الحياة واكتساحه بهذا القدر المذهل مع إن أكله مش حلو أوي ولا خدمته زي بقية المطاعم اليمني اللي موجودة.

لحظتها خطر في بالي إن "حضرموت" ينفع مشروع استخباراتي من الدرجة الأولى!!!!


-3-



وأنا نازل من الميكروباص شفت اتنين ولاد لابسين البتاع اللي مرسوم ده!!

ليه فجأة اللوجو ده بقى منتشر أوي كده؟!
بقيت بأشوفه فعلا بدون أدنى مبالغة بمعدل تلات تي شيرتات ولاد لابسينها وعلى خمس عربيات يوميا!
حد في اللي لابسينه دول عارف إن ده لوجو حاجة زبالة أوي ولا أخلاقية؟!

واحد بس جاوبني إنه :
- "آه عارف.. في حاجة يا كابتن؟!” ...!!!!!

عذرا سيدتي مريم.. انقلبت آيتك!

هناك 19 تعليقًا:

العـابــــــــره يقول...

مازالت تستهوينى كتاباتك
بسيطه و غريبه
لكن مش مبعثره :)


تحياتــــى
العـــابره

آيــة يقول...

اولا مش مبعثرة و لا حاجة :)

ثانيا ..لمست الآية الكريمة و حديثك عنها وترا حساسا مني ... عندما يغمرني شعور بالضعف الانساني الذي يبدو لا منتهي ...لغبائي الشديد لا أراني قوية لأن الله معي دائما و لا ينساني أبدا .. و هو وكيلي في كل احوالي... أكرر غيائي أشد من ان يوصف


ثالثا .. متبقاش تغيب مدد طويلة كده :)

Lamya يقول...

ِAll I can say is that was really really beautifully said. Jazak Allahu Kheir for the comments that make us stop and think and reflect on how we are in comparison to the great figures of the past.

محمد السيد..مش حاسكت يقول...

ولو إنك غلس ومبتكتبش كتييييييييييييييير ....

بس حأفوتها المرة دي .... عشان حاجاتك المبعثرة دي بس ..

طيب ياريت ياسيدي دلوقت ينلاقي أشباه السة مريم . سواء بنات أو ولاد ...

.................
إلا أنا بقي لي فترة نفسي هفاني بجد أدخل تاني أكل منه .. وكل مرة باقول لأ استني حد يكون معايا....
يكونوش نجحوا في استقطابي؟؟؟ وكمان عايز حد معايا؟

يا نهار أبيض؟؟؟؟؟

غير معرف يقول...

حلوة يا ولد بس كان المفروض تنام أكتر شوية عشان تطلع مبعثرات أكتر...و يا سلام بقة لو نمت و انت سايق...هتبقى مبعثرات العمر كله...بعد الشر يعني :)

غير معرف يقول...

بقولك ايه
احسن لك تنام بالليل وتبطل تنام فى المواصلات وخلى مبعثراتك تحصل وعينيك مفتحة عادى والمبعثرات المفتحة احسن من المغمضة

شيرين يقول...

رائع جدا يا مصاعيبو.. أكيد كنت مستلهم روحي المبدعة وانت بتكتب التدوينة
:)

غير معرف يقول...

كل مطاعم حضر موت دي مضروبه بالذات اللي في فيصل --- وده اعتقاد شخصي

وبعدين كويس ان الواد بتاع التي شيرت مضربكش

غير معرف يقول...

معلش يعني في السؤال
هو اللوجو ده ايه المقصود منه؟؟؟
معلش الجهل وحش و العلم نوووور

مُصْعَب إِبْرَاهِيم يقول...

اللوجو ده بتاع مجلة إباحية للأسف..

Amira Qassim يقول...

حلو أوي الربط بين 1 و3 :)
بس قولي يا مصاعيبو ..
انت عرفت اللوجو منين أساسا ^o)

:P

تائهة فى أرض الأحلام يقول...

فكرتنى بواحدة عندها هوس انها هاتموت وحاجات كدة ووعلطول خايفة وكل لما تروح حتى تلاقى حد حط لها اعلان من الشباك عن مطعم حضر .. موت
تفضل طول اليوم متشائمة

تحياتى لك

غير معرف يقول...

خواطر قيمة.. بس بذمتك، دي صورة لميكروباص مصري أصيل شرب من نيلها؟

غير معرف يقول...

بخصوص الميكروباص..
ياريتك المرة الجاية تكتب خواطر مهزوزة من التوك توك..
:)
وسام

Salma Amer يقول...

مش عرفة اية حكيتك مع الميكروباص
بس من الواضح انه مكان جديد للتأمل :)

Amr يقول...

بغض النظر عن الفجوة بين الصورة وواقع المواصلات اللي بنعانيها... التدوينة جميلة جداً... أنا بعشق السيدة العذراء...
تحياتي

حياتي كلها لله يقول...

مش عارفة أقولك اه انا اول مرة ادخلك و معرفش حتي دخلتلك منين مدونتك و قعت في إيدي و خلاص
ولي الشرف طبعا
تحياتي

غير معرف يقول...
أزال أحد مشرفي المدونة هذا التعليق.
غير معرف يقول...

تدوينة معدية يا مصعب كالعادة ومش مبعثرة ولا حاجة
بس هو نوم المواصلات بيعمل كده وزيادة
بالنسبة لحكاية إعلانات حضرموت دي فخلاص بقت مرض بعيد عنك مع إن طعمه زي ما بتقول استغفر الله وخدمته أسوأ لكن ده الطبيعي، لدرجة إني مرة كنت راكبة تاكسي والولد حدف الورقة بسرعة خرافية والتاكسي ماشي بسرعة فعورت وشي بعيد عنك... يعني كمان المطعم ممكن يتسبب في عاهة مستديمة
الحاجة التانية علامة الأرنوب دي... بالرغم من إنها علامة أبيحة إلا إن تلت تربع اللي لابسينها مش فاهمين معناها وفاكرينه لوجو بريء... وأراهنك إن الفلحوس اللي قالك إنه عارف هي بتاعة إيه... أكيد فاكرها محل أرانب شهير مثلاُ في إنجلترا ولا حاجة
وبالنسبة لسؤال أميرة إنت عرفت اللوجو ده منين... ياريت ماتقلقيش يا أميرة، كويس إنك فعلاً عارفه بدل ما تيجي الشغل يوم لابس تيشيرت من النوعية دي
وع البركة