الاثنين، فبراير 12، 2007

تاجات.. تاجات .. أحب عمري وأعشق الحاجات!



`أنا اتبعتلي تلات تاجات.. واحد من كريم والتاني من دينا والتالت من عند وئام

أنا آسف يا كريم ويا دينا إني اتأخرت أوي في الرد عليهم بس ظروف والله

نبدأ بتاج كريم "ده ترتيب التاجات حسب الظهور"..
--------------------

خمس حاجات ما حدش يعرفهم عني...
إممم .. سؤال صعب أوي أوي
بس يللا ..

أول حاجة:
وأنا صغير واحنا في باكستان كانوا مجموعة من المصريين هناك بيصوروا إعلان عن شاي اسمه "شاي الخليل".. وكنت من ضمن الأطفال اللي هم كلموا أبوهم علشان يتصوروا في الإعلان..

المهم رحت وكانوا بيخلونا نشرب رشفة (حلوة رشفة دي) ونقول "شاي الخليل مالوش مثيل" ونشاور بالإبهام "علامة الأوكيه"..
آخر اليوم أخدت علبة ساندويتشات مش فاكر منها غير ساندويتش الهامبرجر بس كنت فرحان أوي.. وعرفت بعديها إن الشاي ده ما نزلش السوق خالص وإن الشركة خسرت... تفتكروا ليه؟!!


تاني حاجة:
واحنا في باكستان برضه كنا بنمتحن في السفارة المصرية.. وكان في فاكهة اسمها هناك "لقاط" ما أعرفش بالعربي اسمها ايه.. كنا بنحبها أوي.. وبنشتريها كل يوم.. وفجأة اكتشفنا إن جنينة السفير اللي بيته جو السفارة فيها شجرتين منها.. فبقينا بنتسلل من ورا الحراس بتوع بيته والأربع كاميرات اللي على أركان البيت الأربعة وندخل نجيب على قد ما نقدر ونطلع تاني.. واكتشفنا قد ايه الأمن بتاعنا جبار!!!
ملحوظة: ده كان بعد سنة ونص من انفجار السفارة المصرية في باكستان وبعد زيادة التحصينات الأمنية! بس لغاية دلوقتي مش عارف هم كانوا سايبننا ومطنشين وللا ما كانوش واخدين بالهم أصلا..


تالت حاجة:
قبل ما أكبر.. وأعرف حاجات كتير ما كنتش أعرفها .. عمري ما رحت لماما أو بابا وسألتهم السؤال البرئ بتاع "بابا هو انتوا جبتونا ازاي؟".. والسبب بسيط.. عقليتي العلمية المعملية العبقرية الفذة توصلت لنظرية كانت تمثل نموذجا كاملا يفسر كل الظواهر الموجودة في ضوء معطيات المرحلة .. كان تفسيري الطفولي للي بيحصل إن هناك بعض المواد البيوكيميائية تنتقل من الأب للأم عن طريق اللمس.. وإن المواد دي علشان تنطلق لازم يكونوا الاتنين متجوزين فعلا مش تمثيل.. لأن المواد دي بتنطلق في حالة واحدة بس وهي اقتناع الطرفين إنهم متجوزين علشان ده بيخليهم في حالة نفسية وسيكولوجية معينة بتيؤدي لإفراز هرمون معين بيخلي المواد دي تطلع!!
ما حدش يسألني جبت التفسير ده ازاي.. بس والله ده اللي كان حاصل.


رابع حاجة:
حاجة كان نفسي أقولها أوي لكل الناس وأطير بيها من الفرحة.. بس هي سر بيني وبين بابا الله يرحمه، وهو مش هنا دلوقتي علشان أستأذنه أقولها.. بس كفاية تعرفوا إن كان نفسي تعرفوها أوي..

خامس حاجة:
المرة الوحيدة في حياتها الله يرحمها اللي رفعت ايدها وضربتني بالألم.. أصل أنا كنت قليت أدبي أوي أوي.. بس ايدك يا أمي ساعتها والله نزلت على خدي زي النسيم.. كنت عاوز أبوسها.. بس ما كانش ينفع.. فعملت نفسي بأعيط أوي لغاية أما أخدتني في حضنها فسكتت على طول.. راحت بصالي وضاحكة وقالت لي أحلى "يا سلام" سمعتها في حياتي.. وفضلت قاعد على الأرض جنب السرير اللي هي قاعدة عليه وراسي على حجرها لغاية أما رحت في النوم..

رب ارحمهما كما ربياني صغيرا

------

آدي يا عم كريم التاج الأول بتاعك..

التاج التاني وبفصيح العربي كده جايلي من دينا

س : ايه اللي هيحصل لايميلك لما تموت؟!
ج: مش عارف!! بس أكيد براء هيحافظ عليه، وكمان فيه بيانات كتير مهمة أوي أوي لأكتر من حد.. فعلى الأقل هيفضل شغال شوية


س: اديت الباسوورد لحد قبل كده؟
ج: أيوة.. براء، ... وحد تاني، بس الحد التاني كان حظه وحش، لأني غيرت الباسوورد قبل ما نفترق وما لحقتش أقول له

س: لو أيوة طبيعة علاقتك بيه ايه؟
ج: براء.. أقل كلمة توصفه .. هو كل عيلتي بجد.. وأخويا وصاحبي وتوأم روحي..
الحد التاني .. كان اسمه حبيب


س: اسمك؟
ج : مصعب.. يعني لما دورت عليها في المعجم "السيد في قومه".. وبأحب بابا أوي علشان اختارلي الاسم ده لأني بأعشقه مش علشان اسمي والله بس بأحبه أوي


س: اسم الدلع المشهور بيه وسط أصحابك؟
ج : براء مطلع علي كام اسم حلوين "مصعب مصاعيبو أبو الأصعاب" يشاركه في هذا الوصف علي، أحمد الهواري بيقولي لي "مصاعيبوز" أو "مصعبز"، أحمد فؤاد مسميني مصعبيسكي، بين المدونين مشهور بـ"مصعبوف"، واحد قريبنا من زمان كان مسميني "مطوبس"!!


س: برجك ايه؟
ج : الحوت


س :شخصيتي نوعها ايه؟!
ج : تقريبا آخر مرة وزنتها كانت x large!
ايه السؤال العجيب ده؟!


س : السفر بالنسبة لك؟
ج : كمية من المشاعر المتناقضة الصعبة الحلوة.. السفر يعني تكوين شخصية وناس جديدة وعادات جديدة وثقافات تانية وأنا بأحب أتفرج وأتعلم أوي.. وفي نفس الوقت يعني زيادة غربة أكتر ما أنا حاسس بيها.. بعد عن ناس بأحبها.. وبلد بأعشقها..
وباقي اللي جوايا ما يتقالش.. يتحس بس، يكفي إنه متناقض أوي.. وإنه بيولد جوايا صراع عجيب.. حلو ووحش أوي أوي..


س : وقت فراغك بتعمل فيه ايه؟
ج : مش لما ألاقي وقت فراغ أصلا! :) .. بس لو توافر بأتصرف حسب الظروف لو في حد معايا .. لو لوحدي يا إما بأنزل أتمشى كتير أوي وأسرح مع نفسي، يا إما بأقعد أشتغل على اللابتوب وأتسكع في طرقات الانترنت بحثا عني


س : الأكلة المفضلة؟
ج : مش عارف.. بس بأحب الأكل البسيط اللذيذ.. اليومين دول أنا مش عارف أظبط نفسي في الأكل علشان شباب عزاب أنا وإخواتي وانتوا عارفين.. لكن لما بيبقى في أكل لذيذ بسيط بأبقى مبسوط جدا.. أهم حاجة العيش.. لأني ما بأعرفش أشبع من غير عيش.. واخدها عن أبويا الله يرحمه اللي واخدها عن أبوه.. واحنا التلاتة الوحيدين في العيلة اللي كده :)


س : الصفات اللي أخدتها من بابا؟
ج : أنا وماما اتعلمنا منه كل صفة حلوة مرتبط بالعقلانية.


س : الصفات اللي أخدتها من ماما؟
ج : أنا وبابا اتعلمنا منها يعني ايه قلب كبير، ويعني ايه مشاعر حلوة لكل اللي حوالينا حتى لو ما بيحبناش أو بيكرهنا


س: أكتنر 6 حاجات بتكرهها؟
ج :
* النوم الكتير
* الحاجات اللي بتتفرض علي من غير اقتناع
* التناقض.. يكون مثلا حد بيقول لك إنه بيحترم رأي الآخر وفي نفس النقاش يشتمك ويسفه رأيك
* التعقيد
* “إنا وجدنا آبائنا كذلك يفعلون"
* حد يعمل نفسه وصي علي أو يعيش دور الناصح الأمين دون مراعاة أن "هنااااااااااااااااك فرررررررررررق" بيني وبينه، بين قناعاتي وقناعاته، تجربتي وتجربته، حياتي وحياته!


س : أكتر 6 حاجات بأحبها؟
* أقعد أعمل لنفسي تحدي أتعلم مثلا حاجة جديدة وأقعد لغاية أما أوصل مركز مهما أخدت من وقت حتى لو ما نمتش لمدة أسبوع أو نسيت آكل أو أي أعراض جانبية تانية
* جوجل بكل ما يمثل من رموز "بساطة-شباب- إبداع- قوة- ثقة- عبقرية-الخ"
* كل الناس
* اللون الأخضر
* اللابتوب بتاعي
* نظارتي

بس اشمعنى 6 حاجات يعني؟!!


س : الشغل بالنسبة لك؟
ج : حاليا.. مدرسة فاتحالي بابها على الآخر.. مصدر متعتي الأول وفرصة لتحدي حقيقي مع نفسي.. موقع عشرينات اللي أنا شغال المبرمج بتاعه اللي هو شغلي .. بأحس إنه ابني.. وكل سطر كود أو database ER diagram أو UML chart لي معاه ذكريات كتييييييييييييييييييير
ابني بجد


س : الكمبيوتر والانترنت بالنسبة لك؟
ج : لو كان السؤال ده من تلات سنين كنت قلت حياتي التانية أو حياتي الموازية، لكن دلوقتي هو حياتي الأولى.. أنا بأتحول لكائن افتراضي.. يمكن ده السبب اللي مخليني عامل مدونة تانية مهتمة بالنموذج التقني من نواحي اجتماعية وسياسية واقتصادية وإعلامية وبالطبع تقنية، بس لسة المدونة بث تجريبي.. هتطلع بشكل كامل إن شاء الله يوم 13 مارس- يوم عيد ميلادي.. بالمناسبة أنا أخرت صدور بيان مرور سنة على بداية مدونتي (26 يناير 2006) علشان تطلع في 13 مارس :)

------
التاج التالت من عند وئام

افتح الكتاب اللي بتقراه دلوقتي على صفحة 123 وعد خمس سطور واكتب أول تلاتة بعدهم..
ما بلاش!! بس ما علينا انتوا أحرار..
Software Engineering observation 11.2
whenever possible, specify the size of a container at compile time (possibly throught a non-type template size parameter).This avoids the the possibility of a potentially fatal executoin-time error if new is unable to obtain the needed memory.



بأمرر التاج دلوقتي لبراء ودعاء وأحمد الهواري ولميا، دول الـcouples اللي في الليلة.. وأحمد عبدالله الشاب الفرداني :)

التسميات:

ÇáÜ 35 Çááí ÚÈÑæäí ÞÇáæÇ :

Ýí ÊãÇã : 12/2/07 1:37 ص, Blogger محمد السيد ÞÇá/Ê :

إيه ياعم الحلاوة دي ... ؟؟؟

ده اسمه كلام يعني ؟؟.
أكتر حاجتين عحبوني .رجالة الأمن المصرييييييييين ... واضح إن كل حاجة مصرية ..بيكون اللي بيحميها من النوع ده .. اللي مبيسمعش ولا يشوفشي ولا يتكلمشي ...


ومش حأعلق بقي ...علي نظرية جبتونا إزاي دي ؟؟؟

عشان أنا برضه كان ليها عندي تفسير شبهك في حتة ... إنه لازم يكونوا متجوزين حقيقي بس .... في الحلال يعني ....

لكن موصلتش للعلم والعبقرية الي سيادتك وصلت لها طبعا ...

رابع حاجة .... كان نفسي أوي أعرفها ...

وشكرا ياعم علي الست حاجات الي بتكرهها فينا ..دي أخرتها يعني ؟؟؟


صحيح ...فكرني لما أشوفك ....... ابهدلك ... وأضربك .. وأزعق لك ... وأفرج المكتب والبيت كله علينا ... وبعدين أسيبك وأمشي ...

حااااااااضر

 
Ýí ÊãÇã : 12/2/07 2:00 ص, Blogger elkamhawi ÞÇá/Ê :

اول مره اقرا تاج واستمتع بيه
مش عارف ليه

 
Ýí ÊãÇã : 12/2/07 2:22 ص, Blogger اميرة هشام ÞÇá/Ê :

انا مش فاهمة اصلا يعني ايه تاج

عشان كدة اول مبيجيلي بمسحه

ده العلم نور صحيح

 
Ýí ÊãÇã : 12/2/07 4:09 ص, Anonymous علا ÞÇá/Ê :

دى كده مش تاج
دى كده برنامج مارس هوايتك بتاع القناة التالتة خدمات
اللى بيجى عالارضى
بس ايه يا عم انت ايه الروقان ده بس
بيوكيميائية!!
هههههههههههه
ربنا يبسطك يا بروف

 
Ýí ÊãÇã : 12/2/07 10:41 ص, Blogger Cerebrosus world ÞÇá/Ê :

"كان تفسيري الطفولي للي بيحصل إن هناك بعض المواد البيوكيميائية تنتقل من الأب للأم عن طريق اللمس.."

اول ما قرات القطعه دي اتكب النسكافيه على الكيبورد !!! مستحيل

 
Ýí ÊãÇã : 12/2/07 11:21 ص, Anonymous غير معرف ÞÇá/Ê :

علي فكرة دا احلي موضوع قريته علي البلوج بتاعك بالنسبة لي
في حاجات ضحكتني جدا و حاجات جاتلي علي الجرح عشان شفت فيها نفسي

ربنا يصبرك و ابقي اكتب علي طول .. الكتابة بتظبط حاجات كتير

فاطمة

 
Ýí ÊãÇã : 12/2/07 11:58 ص, Blogger صوت عصفورة ÞÇá/Ê :

اتمنى تزور مدونتي الجديدة المتواضعة ... متقولوش علي غلسة لو سمحتم
ba7ebelnoor.blogspot.com

 
Ýí ÊãÇã : 12/2/07 7:04 م, Blogger we2am ÞÇá/Ê :

انت معملتش التاج اللي انا بعتهولك ليه دلوقتي؟ :@
anyway..some answers i liked here..bta3 so2al el sh7'syya gamda awe! :D

 
Ýí ÊãÇã : 12/2/07 8:12 م, Blogger مصـ( الخير )ـعب ÞÇá/Ê :

محمد السيد باشا.. منورنا جدا
بس مين قال لك إن الست حاجات دول فيك؟!! أنا مش قصدي عليك خالص والله
وعاوز تضربني ليه بس كفى الله الشر؟!!


علاء باشا بيه، أنا مش عارف أقول لك ايه بس كلامك وسام على صدري


أميرة هشام.. لي شرف إنك تعرفي ده مني ومنورانا والله


ماشي يا بيوكيميائية.. قصدي يا علا.. لما أشوفك أونلاين بس :)


أحمد عبدالله صاحب العالم المجنون .. مش عارف أقول لك ايه، بس بكرة لما آجي المكتب هأمسح معاك الكيبورد وأنضفه


فاطمة .. احنا اتكلمنا أونلاين، بس ده لا يمنع أشكرك تاني


صوت عصفورة.. مش هنقول عليكي غلسة.. بس كنتي علقي على الموضوع يعني :)


وئام ربنا يخليكي ومعلش ما أخدتش بالي، وآديني ضفت التاج بتاعك

 
Ýí ÊãÇã : 12/2/07 10:00 م, Blogger أروى الطويل ÞÇá/Ê :

لا والله احلى حاجه بتاعت السفاره المصريه
والبتاع ده اللى انتو بتكلوه والله حككتنى
اه قبل ما انسى
لا اسكت الله لك كيبوردا ماحدش شافك من زمان ليه
وشيل الورد فيرفيكشن علشان بتنرفزنى لو سمحت يعنى

 
Ýí ÊãÇã : 12/2/07 11:19 م, Blogger اصرار أمل ÞÇá/Ê :

مايعجبنى فى كتاباتك ولعك الشديد بأبويك رحمهما الله وأسكنهما فسيح جناته وجمعكم بهم فى جنات ونهر فى مقعد صدق عند مليك مقتدر .............
ربما لأنه يلامس فى داخلى ذكرى أبى رحمه الله أو ربماهى مشاعرك الصادقة ........
لكنه أكثر ما أعجبنى هذه المرة .....
________________________
وبعدين فينك من زمان ماشفناش حاجة جديدة ؟
__________________
وأود أن أشكرك لهذه المساحة الراقية من البوح ..........
تحيااااااتى لك ............

 
Ýí ÊãÇã : 13/2/07 12:32 ص, Blogger ياء ÞÇá/Ê :

شكلك كنت عفريت فى باكستان

بس كان لازم التاج يجيلك عشان نعرف الذكريات دى

متبقاش بخيل فى ذكرياتك

 
Ýí ÊãÇã : 13/2/07 1:25 ص, Blogger fnan_geology ÞÇá/Ê :

ايه اللى انتا فيه ده

مصعب بجد
انى احبك فى الله

وسلاااااااام

 
Ýí ÊãÇã : 13/2/07 7:45 م, Blogger sharkawoo ÞÇá/Ê :

إيه الجمال د...

لا والله كويس جداً....

أنا رأي تبدأ تكتب مذكراتك :)

 
Ýí ÊãÇã : 13/2/07 9:23 م, Blogger أميرة البلطجية ÞÇá/Ê :

تحفة..كت مستنية تجاوبه التاج ده انت كمان..اصل الدنيا كلها عاملاه بس في ناس كده الواحد يحب يقرا اجابتهم

 
Ýí ÊãÇã : 14/2/07 12:07 ص, Blogger واحدة بتحب البلد دي ÞÇá/Ê :

لما بقرا كلامك عن والدك ووالدتك الله يرحمهم ...
بصراحة باحاول امنع دموعي انها تنزل
وغالبا بتخونني وبتنزل

اما بقي ال6 حاجات اللي بتكرههم ..والله من غير ما اقرا كلام محمد السيد قلتها لما قريت كلامك....متهيالي مش الكل كده ..مش معقول ما قبلتش حد كويس ..ارفض سياسة التعميم وبشدة

عموما الموضوع من احلي موضوعات البلوج..
شكرا للي بعتولك التاج...
شايلينلهم الجميل

 
Ýí ÊãÇã : 14/2/07 6:45 م, Blogger KING TOOOT ÞÇá/Ê :

عارف يا مصعب أجمل حاجة في مدونتك إيه ؟
إن كل كلمة أنت بتكتبها في المدونة دي بتنطق صدق
أستمر صادق في قلمك و إحساسك و أوعى تخللي الدنيا تسرق منك الحاجة الجميلة دي أبداً
KING TOOOT

 
Ýí ÊãÇã : 14/2/07 10:03 م, Blogger shabfa2re ÞÇá/Ê :

باكستان يا مفترىىىىىىى

 
Ýí ÊãÇã : 15/2/07 12:44 ص, Blogger مصـ( الخير )ـعب ÞÇá/Ê :

أروى .. شكرا على المرور،
أنا كمان وحشتني الفاكهة دي أوي وجعت دلوقتي :)
وإن شاء الله هأحاول ما أغيبش عنكم كتير تاني


أمل غنيم
والداي هما أكثر مشاعر صادقة عشتها في حياتي، ولما بأكتب عنهم هي بتيجي لوحدها، وبأقراه زي زيكم بالظبط كأني بأقراه أول مرة
الله يرحمهم
وآديني جيت تاني :)
تعبير "مساحة راقية من البوح" لامس وترا داخلي، أشكرك عليه

ياء
واحشني والله
أنا ما كنتش عفريت أوي، كنت شقي صغير، إنما بقية اللي كانوا معانا هم اللي دربوا العفاريت :)
وأنا مش بأقصد أبخل بذكرياتي ولا حاجة، بس هي بتيجي كده


فنان جيولوجي
ربنا يكرمك يارب
أحبك الذي أحببتني فيه

أميرة
الكلام ده كتير علي

شرقاووه
أهلا بيك
وأوعدك هأحاول أعمل ده


واحدة بتحب البلد دي
اللهم يرحمهم بقى
أنا بس عندي اعتراض صغير على تعليقك وتعليق محمد السيد، أنا ما قصدتش حد بعينه، وأعدت قراءتهم تلات مرات علشان أحاول أستشف حاجة ليها علاقة بحد معين ما لقيتش..
أنا مش عارف انتوا ليه بتقولوا كده..
كل الحكاية إن دي نقط ما بأحبهاش أيا كان بقى الشخص اللي بيعملها وأيا كان انتمائه، حتى لو أنا


كينج توت
كلامك جاي ع الجرح
والله خايف الدنيا تسرق ده كمان مني
ادعيلي أوي

شاب فقري
وأنا مالي يا عم؟
أبويا اللي كان شغال هناك :)

 
Ýí ÊãÇã : 15/2/07 7:52 ص, Blogger Dananeer ÞÇá/Ê :

حاولت اتخيلك كده طفل و بتقول شاى الخليل مالوش مثيل!
:)

باكستان كانت حلوه؟؟
حاسه من كلامك انها شبه الدوله العثمانيه

 
Ýí ÊãÇã : 15/2/07 1:53 م, Blogger دينا فهمي ÞÇá/Ê :

حمدا لله على السلاااااامة
بركة انك وصلت بخير (:

 
Ýí ÊãÇã : 16/2/07 8:47 م, Blogger nour ÞÇá/Ê :

:))))))))))))))))9
ردودك ملهاش حل
انا بحب اقولك مصاعيبووووز برضه
والدك و والدتك مأثرين فيا اوى
الله يرحمهم

 
Ýí ÊãÇã : 17/2/07 7:17 م, Blogger كركوبة ÞÇá/Ê :

الجميل فيك كتير
ومش عاوزة اعيد كلام قيل من ذى قبل
بس هقول حاجه واحدة
انك رغم الخربشات كتير اللى مريت بيها الا انك مازلت نقى جدا
وده اجمل ما فيك
نقااااااءك

 
Ýí ÊãÇã : 18/2/07 7:10 م, Blogger بنى أدم مع وقف التنفيذ ÞÇá/Ê :

انا سمعت أنك تعبان
سلامتك يا عم
ياريت اول ما ترجع تكتب على طول
تطمينه عليك

 
Ýí ÊãÇã : 19/2/07 4:19 م, Blogger Ghada ÞÇá/Ê :

ألف سلامة عليك يا مصعب..

أنا محبيتش أعلق عند براء أو دعاء..مش عارفة ليه الحقيقة..

اجمد كده أمال

 
Ýí ÊãÇã : 20/2/07 5:34 م, Blogger أروى الطويل ÞÇá/Ê :

يا جماعه مصعب عامل عملية الزايده الف سلامه وحد يسأل عليه

 
Ýí ÊãÇã : 20/2/07 10:42 م, Blogger Epitaph ÞÇá/Ê :

الف سلامة

ترجع لينا بالسلامة ان شاء الله

 
Ýí ÊãÇã : 21/2/07 2:27 ص, Blogger دعاء عادل ÞÇá/Ê :

انا كل يوم ادخل اشوفك كتبت حاجه جديده ولا لسه

بجد وحشتنا اوى
ومفتقدينك اوى اوى اوى اوى
انشاء الله تخف بسرعه وترجعلنا بقى
الحياه نقصاها حجات كتير يا مصاعيبو

 
Ýí ÊãÇã : 22/2/07 2:39 م, Blogger اصرار أمل ÞÇá/Ê :

مصعب .. لم أعرف الى الآن بمرضك ....
ألف سلامة عليك ...
ولا بأس طهور ان شاء الله ...
أسأل الله العظيم رب العرش العظيم أن يشفيك ...
وان شاء الله لن تخلو ( اما كفااارة )أو رفع درجات ولعلها تكون رفع درجات باذن الله ...
نتمنى أن نراك قريباااااا

 
Ýí ÊãÇã : 23/2/07 2:16 م, Blogger محمد السيد ÞÇá/Ê :

ارجع بقي ...

يوم ما كنت عندك .. القطر فاتني ...ومقابلتش الناس اللي كنت عايز أركب معاهم ...

وكمان ملحقتش اقعد معاك خالص ...

وكنت خلاص علي وسك أولع وأنفجر وأزعق وأبهدل الدنيا .....

وكنت حأرجع لك علي فكرة بس قلت الوقت اتأخر ....


بس رغم كل ده مبسوط إني قدرت أطمن عليك ....

وكنت عايز أقعد معاك بجد أكتر من كده ...

قلنا لك خد أجازة بالذوق وإنت مرضتش ....

كلنا .... مستنيينك ..

 
Ýí ÊãÇã : 23/2/07 3:42 م, Blogger smraa alnil ÞÇá/Ê :

بص بق انا قلت للهواري يقولك الف سلامه عليك اول ما عرفت ان انت في المستشفي
وصلت ولا لا
عشان لو مش وصلت هروح اشوف شغلي معاه

المهم انت فينك بقي عايزة اطمن عليك
ربنا يرجع بالسلامة يارب

 
Ýí ÊãÇã : 24/2/07 4:27 ص, Blogger AbdElRaHmaN ÞÇá/Ê :

بالسلاااامه يا مصاعيبو
قوم يا جدع وبطل دلع :D
بالسلامه ان شاء الله يا حبيبي
ربنا يشفيك يا رب
سلام

 
Ýí ÊãÇã : 24/2/07 12:06 م, Anonymous shiko ÞÇá/Ê :

سلامتك يا مصعب
يالا اتجدعن
عايزين نقرأ لك بوست جديد
ربنا يقومك بالسلامه

 
Ýí ÊãÇã : 25/2/07 12:25 ص, Blogger ذو النون المصري ÞÇá/Ê :

زكرياتك جميله جدا
انا رديت علي نفس التاج من مده و كان لي زكريات اخري لكنها ايضا جميله بحبها جدا
.......
كيف صحتك الان انا سمعت بعض الاخبار عن عمليه او شيء مشابه
ارجو ان تكون بخير

 
Ýí ÊãÇã : 25/2/07 11:54 م, Blogger fnan_geology ÞÇá/Ê :

ادخل عندى ضرورى جدااااااااااااا
وانصر الطلبه المفصولين

وسلاااااااام

 

إرسال تعليق

áíäß ÇáÊÏæíäÉ Ïí :

إنشاء رابط

ÇáÑÆíÓíÉ> >