الجمعة، يونيو 02، 2006

ربما يكون مغلقا أو خارج نطاق الخدمة..


لما تبقى بقالك يومين بتتصل بشخص معين و عاوز توصل له ضروري و كل مرة :

- الهاتف الذي طلبته ربما يكون مغلقا أو خارج نطاق الخدمة!!!

ستصاب حتما إما بخنقة شديدة أو شلل أطفال و يمكن تدعي على شركة نوكيا (أو حسب ماركة موبايل الشخص ده) لأن بطارياتها ما بتقعدش كتير و أكيد هتدعي على "أم نبيل" و فودافون على سبيل الاحتياط لو اتضح إن العيب في الشبكة (قال ايه مش واصلة له!) و إن يطارية موبايله طلعت مشحونة!!

و مع ذلك هتلاقي الست الباردة دي لسة بترد نفس الرد بنفس الأسلوب اللي ينقط! المفروض أول مرتين تقول نفس الجملة، و بعد كده مثلا تقول:

- معلش يا أفندم احنا آسفين هنحاول نوصله و لكن "الهاتف الذي طلبته ربما يكون مغلقا أو خارج نطاق الخدمة"!!

و لما تلاقيك لسة مصمم تكلمه يا إما تقف جنبك في محنتك و تبتدي تحسسك إنها معاك في أزمتك و تبدأ تفكر معاك :

- يا تري يمكن يكون فين؟! حاول تفتكر كده .. طيب ما عندوش تليفون أرضي؟! أصل "الهاتف الذي طلبته ربما يكون مغلقا أو خارج نطاق الخدمة"!!

و بعدين المفروض .....

سلام دلوقتي علشان موبايله بيدي جرس!

هناك 7 تعليقات:

..:::MiMo32:::.. يقول...

هههههههههههههههههههههههههههه
يا عم شركات الموبايل دي عايزة الحرق
سيبك من ام نبيل حودة فون او زيرو حشرة او كما يقول البعض زيرو بريزة
المهم كليك معينا شوية نسوان ناااار يردوا على الناس انا من ساعت مشتريت الخط الجديد و انا بقيت بنبسط قوي لما واحد مبايله يكون مغلق ولا محروق عشان بقعد احكي مع الولية الي بترد دي :
يوووه بقى معلش اتصل بعدين عشان الموبايل الي بتتصل بيه ده مش عارفين نجيبه باي بقىى

ههههه
وشكرا :D

محمد السيد..مش حاسكت يقول...

مفيش مشكلة .
أهه ده تلاقيه في سجن طرة العمومي دلوقتي ... وواخدين موبايله في الأمانات لغاية ما يخرج ..

لو مكانك أدعي له إنه يعرف ياخد الموبايل وميسرقهوش منه .....زي ما أخدوا الكاميرات مني .........

منهم لله .... مش بتوعي
يلا يا عم سلام... قلبت علينا المواجع

غير معرف يقول...

يا عم الكلام ده مش فمصر بس..دي ظاهرة عالمية، والإرهاب أصله ملوش دين ولا ملة زي حسني مبارك..........ما بيقول..

المهم يعني كلمته؟

Ahmed Shokeir يقول...

أرحم برده

هاها .. هنا في السعودية بيقولك الرسالة دي راجل

غير معرف يقول...

ألبلوج حلو ربنا معاك
يا احمد لو غيرت الخدمه على الموبيل بتاعك للإنجليزى
هتقولك الرساله واحد ست و كمان مره واحده مش هتعيدها

ياء يقول...

المشكله الاكبر لو تسمع رساله

عفوا قد نفذت صلاحيه البطاقه
تجرى تدور على كارت شحن

محمود يقول...

و ايه المانع المرادي تقلك معلش يا فندم احنا اسفين و بعدين تفتكر راح فين و بعدين انا اسمي عدلات و ماتيالا نتجوز
ايه يا عم مصعب ما تصلي على النبي