السبت، يناير 12، 2008

والساندويتش كويس؟!


أحمد حلمي نازل من العيادة النفسية بتاعت خالد الصاوي في فيلم "كده رضا" ويادوب بيعدي الشارع راحت منة شلبي خبطته بالعربية..
وقع أحمد حلمي على الأرض
ونزلت منة شلبي تشوف الكارثة اللي حصلت

- معلش أصل أنا ما أخدتش بالي وأنت طلعت فجأة
- حصل خير.. جت سليمة
- أنت كويس؟
- انتي كويسة؟
- أصلي كنت بأعدل الساندويتش فالكاتشب بظ على الفستان.
- و الساندويتش كويس؟!

***
رايح أركب المترو كأي مواطن صالح من محطة الجيزة اللي في شارع الهرم، وماشي في الشارع بأمد علشان عاوز أوصل بسرعة و.. وفجأة لقيت حاجة بتلمس رجلي من ورا!
التفتت لقيتهم اتنين بنات راكبين عربية وواحدة فيهم سايقة، لسة هأقول لها أو أشاور لها تقف أو تاخد بالها أو تعمل أي حاجة لقيت مشط رجلي اتلوى تحت الكاوتش!!

هي وقفت فجأة وأنا مسكت نفسي علشان ما أقولش آه بالعافية، الوجع كان جامد بجد.

بصيت في رجلي لقيت فردة الكوتشي اتقلعت واتشحورت من هول المفاجأة ومشيت الخطوتين اللي بيني وبين الرصيف علشان أقعد أتفحصني..

البنتين نزلوا مرعوبين ومش عارفين يتكلموا..

- أنت كويس؟!

وأنا ما رديتش في ساعتها علشان أنا شخصيا لسة مش عارف الإجابة!!

بعد ما حركت رجلي شوية واتأكدت إن الدم اللي نازل من صوابعي علشان الخبطة وفحصتها واتأكدت إن مفيش حاجة كبيرة حصلت (خبرتي في حوادث الكشافة البحرية لعبت دور كبير هنا)، آخرها يعني جزع والحمدلله مفيش شرخ ولا كسر قلت لها

-أنا كويس، اتفضلي انتي اتوكلي على الله..
-ازاي يعني أتفضل؟!! أوديك المستشفى طيب؟!
-يا ستي أنا عارف أنا كويس الحمدلله مع السلامة
-أوصلك لأي حتة طيب أنت عاوزها؟
-لا يا افندم أنا هأركب المترو

كانت على وشك تعيط وهي بتقول:

-بس أنا اديتك كلكس والله!!

صعبت علي جدا، وقلت لها بمنتهى الهدوء وابتسمت علشان أخفف عنها الخضة:

- على فكرة الكلكس مش كل حاجة في السواقة! في فرامل وكان في مساحة فاضية كان ممكن تدخلي شمال شوية وتعديني.. ابقى خللي بالك المرة اللي جاية!

هي سكتت وما كانتش عارفة تقول ايه..

عسكري كان واقف بعيد جاء فجأة وبيبص للبنت بنظرة غضب نارية، لو كانت قتلت له قتيل ما كانش بصلها كده! وداخل باللاسلكي في وشي وبيقول لي :

-في حاجة؟!

فقلت له :

- لا يا افندم، دي حاجة بسيطة
- يا ابني قول ما تخافش (بنبرة شريرة جدا مش عارف ليه، والبنت كانت خلاص بتفرفر من الرعب)
- يا عم قلت لك خلاص والله

كل يوم بأشوف الشعب المصري ملموم على حاجة بس قليل جدا لما بتبقى اللمة دي عليّ
واحد بيقول للتاني :

- بسرعة روح هات مياه دافية من القهوة اللي جنبنا يحطها على رجله

اللي جنبه على طول يقول له :

- أنت عبيط؟!! هات مياه ساقعة!

وواحد ربنا يكرمه جاب لي منديل علشان أمسح شوية الدم اللي نزلوا،
والباقيين مشكورين عاشوا دور المتفرجين الكرام..

وفضل الشعب ملاحقني حتى لما قمت وركبت المترو والمترو اتحرك!
لقيت واحد بيقول لي مشكورا : "المفروض تلحق تعمل لها أشعة وإلا ممكن توصل لبتر!"


رحت المكتب وفضلت هناك شوية ولقيت الوجع بيزيد شوية، فكلمت عمر أخويا علشان آخد منه المفتاح لأن مفتاحي ضايع، أول ما عرف قال لي استنى عندك وجالي ورحنا سوا للدكتور علشان لا قدر الله الأمور ما تتفاقمش..

ربنا كان مسهل الدنيا بشكل غريب رحنا دخلنا على طول بعد الراجل اللي كان جو رغم إن الجمعية الطبية زحمة جدا جدا جدا..

دخلت للدكتور وكان بيكلمني منتهى الاقتضاب.. يكاد يصل لمرحلة "ايه لعب العيال ده؟!” في نظرته..

قعد فعص في رجلي شوية وأول ما لاقاني بأصرخ قال
"الحمدلله جت سليمة..دي مجرد كدمة خد المرهم والبرشام ده و ....” وكمل تعليماته الطبية من إني ما أمشيش كتير عليها وما أتنيش المفصل وأحطه في تلج، وبعد كده تراجع علشان الدنيا أصلا ساقعة..
وخرجنا وروحت على البيت..
ورايح الشغل بكرة إن شاء الله..


المشكلة بجد إن فردة الكوتشي الشمال باظت، وهأضطر أستلف صندل أخويا بكرة!

هناك 33 تعليقًا:

بنت امي الغالية يقول...

ياعيني يا مصاعيبو، معلش مش تبقى تخلي بالك من الكلسات يا مصعب ماهي الست مش هتقطع نفسها يعني هتضرب كلكس ولا تفرمل ولا تعمل ايه يعني الرحمة شوية مش كفاية انها سايقة اصلا

الف سلامة عليك بس المرة الجاية ابعد عن كل الستات في عربية المترو وعربيات الشارع كمان

nyira_elsheiref يقول...

تعيش وتاخد غيرها يا معلم
أنا بهزر طبعا مش هتاخد غيرها ولا حاجه
المهم إنها جت سليمة الحمد لله
ومجربة أنا إحساس لمة الشعب المصرى على شىء ما دى (:

menSh يقول...

سلامتك يا مصاعيبو

ربنا يحفظك يابني وينجيك إن شاء الله

معلش.. دي من مستلزمات المواطنة.. إنك تعيش.. وتاخد غيرها.. إذا إنت ما أخدتش.. ومال عاوز مين يعني ياخد!

Salma Amer يقول...

الف سلامة يا مصاعيبو إن شاء الله كل الناس الوحشة وانت لأ
بس محدش ينكر ان الحادثة كوميدية بجد وبعدين انت اللي ماسمعتش الكلكس تبقى غلطان اكيد وبعدين المرة الجاية ممكن تشوف بظهرك مثلا حاول تخلي بالك اكتر من كدة
وقبل ما انسى سلامة الكوتشي بتاعك انا عرفة انه كان عزيز عليك بس ادي حال الدنيا تنزل من البيت بفردتين سلام ترجع بواحدة بس اييييية دنيا معلش تعيش وتفتكرة بقى

ghada يقول...

ma3lesh ya mos3ab pasha :), eb2a rakeb lomad , wala ay merayat 3ashan teshof elly warak
asl fe nas beteb2a mesh fadya we heya betsoo2 :)


ma3lesh 7asal 5eer

fnan_geology يقول...

حمدالله على السلامه
بس مقلتش
سالتها الساندوتش كويس ولا لا؟

:)

وسلااااااااام

mohamed يقول...

ألف سلامة عليك يامصعب ..

شفاك الله وعافاك

بس في سؤال عايز اسئلة

ولا اقولك بيني وبينك بقى

حلم الحرية يقول...

اهم حاجة مقلتلناش

السندويتش كويس
?????
:D

الحمد لله انها جت سليمة..والف سلامة عليك
:)

Epitaph يقول...

واخبار السندوتش ايه صحيح؟
:))

الف سلامة عليك يا فندم
وجت سليمة
:)

sameh يقول...

يا زعيم ألف سلامة
وابقى خلى بالك من عربيات الناس المرة الجية مش كل يوم تخبطلك عربية

أحمد رفعت يقول...

الراجل اللى تدوسه عربية ميقلش لاخواته علشان يجيوا يطنوا عليه ا يستاهلش سلامتك ..

روح يا مصعب ضيعت من ايدي حبة صور كانوا هيبقوا في الجون ...

الكلام خلص

أميره..من غير قصر و لا بستان و لا الشاطر حسن كمان يقول...

انا اقولك بقي علي اللي حصل بالظبط
هي كانت سايقة ولا بيها ولا عليها وبعدين شافتك و انت بتعدي الشارع و اتسحرت بعيونك الأخضره;) وحصل ارتباك و عدم تركيز ونسيت السواقة بقي و الفرامل وكل حاجه...و الدليل انها كانت مصممة انها توصلك الحتة اللي انت عايزها :):)

عشان بس تعرف ف الاخر ان انت اللي غلطان...انت اللي عينيك خضراء

الف سلامةعليك يا مصعب افندي:)

أحمد..فيه ما فيه يقول...

المهم ان الساندويتش بخير..

kimof911 يقول...

السلام عليكم و رحمة الله و بركاته

ألف ألف سلامة يا مصعب

تقوم بالسلامة ان شاء الله :)

شيرين يقول...

الخبط للجدعان يا مصاعيبو ولا يهمك.. ربنا يسلمك دايما ياااا رب

أحمد يقول...

والله انت راجل محترم

همسة قلم يقول...

حمدا لله على سلامتكم اخى مصعب

ومعلش على الكوتشي يتعوض ان شاء الله ..
ألف لا بأس عليكم

الطائر الحر يقول...
أزال المؤلف هذا التعليق.
الطائر الحر يقول...

ألف سلامه يا مصعب الخير
انا عارف ان الناس هتعلق كتير علي الساندوتش بس انا هعلق علي الناس
فالموقف ووصفك للموقف فكرني بمقوله لواحد وقع في حفرة فتجمع عليه كثير من الناس فقال ( مالكم تكأكأتم علي كتكأكئكم على ذي جنة افرنقعوا عني)
وبالتوفيق
( شاركوا معنا فى وثيقة الألف مدون للتضامن مع أحمد محسن )

RAMA يقول...

إسمح لي بعد إذنك بشوية رغي كده على الماشي علشان مش حينفع مرغيش في موقف زي ده

عمرك شوفت حد في الدنيا على وشة تعبير إنه مخضوض وفي نفس الوقت فطسان على نفسه من الضحك.. انا دخلت في الحالة دي لما قرأت البوست.. المفروض إني مخضوض علشان في حادثة وأكشن وكوتشي مخلوع بقى وحركات وفي نفس الوقت فطسانة على روحي من الضحك علشان مشهد الفيلم اللي شوفته كتير في الإعلانات وعمري ما زهقت منه وبحبه جدا كمان لأنه بيفكرني بنفسي ، أنا صحيح مش عندي عربية إلا إن مافيش يوم بيعدي من غير ما أصتدم بحد ومش أي خبطة الصراحة بتكون في الصميم ودايما أنا اللي مش مركزة وبكون السبب في الخبطة وساعتها بيبقى نفسي اللي خبطة يسألني "والساندوتش كويس؟".. وعلى فكرة بتكون معجزة لو روحت بيتنا يوم من غير ما أخبط حد.. مش عارفة لما يكون عندي عربية حيحصل ايه .. هههههههه

واللي ضحكني جدا بردوا موضوع الكوتش ده، ولا الراجل بتاع "البتر" .. هي كلمة توجع الصراحة بس موتتني على نفسي من الضحك ... لا بجد يا مصعب أبدعت .. محدش قبل كده إقدر يخليني مخضوضة وفي نفس الوقت فطسانة على روحي من الضحك

شوفت بعد الرغي ده كله نسيت أقولك أهم حاجة "سلامتك وربنا يشفيك" يلا بسرعة قول أمين

سلامات

:)

دوللي يقول...

سلامتك يا مصعب ان شاء الله الناس الوحشين

امرأة تقول الذي لا يقال يقول...

الف سلامة عليك

بس بجد تعليقات الناس تحفةةةةةةةة

غير معرف يقول...

الف سلامة للكوتشي والسندويتش
ليه كل الحاجات الجميلة اللي فيها شين بتبوظ بسرعة يا تري
جاوب يا فيلسوف مصعب

ساعد نسرين الايمن

هنا الجنة يقول...

ana awel mara agy hena..bs fe3lan enta 3andak 7a2..e7na fe 7agat kteer awy 7awaleena bete7sal ghareeba we malhash m3na..atmanna enena nesebha we nerakkez fi el mohem

gameel enk mardetsh tekhawef el bent aktar mahy khayfa..de rogoola menak 3alafekra..fe gheerak kan 3amal elmawdoo3 fedee7a :))

alf salama

Mony The Angel يقول...

salamtak alf salama

مي كامل يقول...

الف سلامة يا ريس
معلش هم كل ارباب الكيبورد والماوس بيتصابوا كدة.. قلة بقى فى البلد والعين عليكو والعدو متربصلكوا
هههههههههههه
الف سلامة يا مصعب.. الحمد لله قدر ولطف
(F)

خلود صلاح يقول...

هههههههههههههههههه

كوتشى ايه بس؟؟

سلامتك

زى الهوا يقول...

يههههههههههه حضرتك مسهل الموضوع اوى , دا المصريين خصوصا بيحبوا يهولوا المواضيع اوى , دا انا لسة صحبتى بحدفها بالقلم من يومين لقيتها عمالة تعيط , خلاص يعنى القلم وجعها ,

البلوج جامد بحييك عليه

weswes يقول...

الف سلامه يا عم مصعبوف
خالى بالك وانت ماشى هو انت ناسى انك فى مصر ولا ايه
الست يا اما تسوق يا اما تفرمل انت هتحيرها ليه بس
انت ركز شويه
:)

Mariam يقول...

وأنا أقول انت ليه لابس سليبر مفتوح من كل ناحية في عز التلج اللي إحنا فيه ده واتكسفت أسألك.. أتاريك خبطتك بنت في الشارع وفرمت رجلك ... سلامتك ألف سلامة يا مصعب ... وعلى العموم الموقف ده فيه ثلاث نقاط مهمة ... أولاً إن اللي خبطتك بنت وأحمد ربنا لأنه لو كان ولد مش بعيد كان بعد ما خبطك .. يطلع يضربك ويشتمك ويقولك ما تفتح يا حيوان .. ودي حتكون أقل شتيمة .. وده لأن الولاد ما بيحبوش يعترفوا إنهم غلطوا وبلطجية سواقة ومابيخافوش..
ثانياً ... لازم يظهر العسكري المترصد لكل شخص خسيس معاه حبة فلوس خلوه يسوق عربيةولازم يكون ضد الشخص السواق على أساس إنه أغنى!!!
وساعات يبقى حيموت ياخد قرشين من العملية دي علشان يفوت الأمور بمزاجه ومايعملش محضر، وخصوصاً لو كانت بنت أو واحدة ست اللي سايقين!!!
ثالثاً... الشعب المصري اللي بيفرح في اللمة والزحمة والمصيبة واللي بيفتح قسم إفتاء فوري بيتضمن معلومات طبية وقانونية وإجتماعية ودينية ... وبرضوا بيهبوا في السواق على أساس إنه بيمثل لهم رمز مصغر للسلطة والمال والطغيان ... ولا أنت إيه رأيك؟؟؟

Reemo يقول...

ألف سلامه يا مصعب
بجد سلامتك
ابقى خد بالك من الساندويتش كويس المره الجايه
:)

ihapoof يقول...

سلامتك يا كبير .. وسلامه الكوتشى (:

nour يقول...

الف سلامه عليك يا مصعب