الخميس، ديسمبر 13، 2007

أنا جنبه بس..


اتقابلوا مرة

- مالك؟! شكلك مهموم حزين..
- حاسس إني تهت، والهم فوق الكتف زاد

ابتسم له وخده في حضنه

- صدقني يا ابني، طول ما أنت قريب من ربنا ما هتحس باللي أنت بتقوله ده.. قرب منه ده بيحبك وهيمدلك ايديه ويحتويك..

وسابه ومشي، وساب معاه بداية فرج..

***
بعد سنة في نفس المكان،

- ...
- مالك؟! مهموم حزين.. مش أنت اللي قلت لي إن اللي يقرب من ربنا عمره ما يجيله هم؟!
- ...
- هو أنت ... بعدت؟!
- لا والله.. أنا لسة هناك بس ... (ويسكت منه الكلام)
- بس ايه؟!
- بس سرحت في نور مضلم، ونسيت إنه هو النور.
صدقني..
أنا من ساعتها مابعدتش..
أنا جنبه والله..
أنا بس يمكن نسيت..

هناك 21 تعليقًا:

أميره..من غير قصر و لا بستان و لا الشاطر حسن كمان يقول...

ياااااااااااااااااه
و انا كمان يمكن فى لحظات كتيرة....نسيت
لكن اللى واثقة منه ...ان هو مش بينسانا

العـــــابــره يقول...

ويسكت منه الكلام

مشاعرها عميقه اوى
كلمات بسيطه واسلوب ساحر

تحياتى
العـابره

محمد السيد..مش حاسكت يقول...

إيه يا أخي ده ؟؟؟؟

وقدر ينسي ؟؟ معقولة قدر ؟؟

ينسي؟؟؟


خدني معاك جنيه ... ونفكر بعض ...

عمر يقول...

انا مش هعلق وانت عارف ليه
):

camellia يقول...

يا الله....حلوة أوي وجاتني في وقتها اوي
حلو تعبير نور مضلم ده أد ما هو بسيط أد ما هومعبر
روح يا ابني الهي ينورلك طريقك بنور حقيقي دايما....

Amr Magdi يقول...

جميل تعبيرك يا مصعب..

لي تعليق مفصل ، ربما أكتبه في تدوينة خاصة لاحقا

ربنا يقويك

marwa salah يقول...

هو قريب أوووووى بس إحنا اللى محتاجين ناخد بالنا ونحطه فى بالنا

على طول .. مش وقت ما نتزنق

أحمد..فيه ما فيه يقول...

وماذا عن قربك انت؟

أحمد رفعت يقول...

لو نسيت تبقى انت مش جنبة أصل اللي جنبه عمره ما بينسى

ده جنبه

دوللي يقول...

مينفعش تكون جمبه وتسرح في نور مضلم لانه وانت معاه مينفعش يكون في ضلمة هو النور
خليك حنبه بقلبك وعقلك وكل مافيك .

شوشو يقول...

قصه قصيره ولكن معنيها كبيره وحلوه ده زي العظه وعبره للي بعد ونسى !!! بس في واحد عمره مابنساه مهما بعد ومسيره يرجعه في يوم من الايام.....

fnan_geology يقول...

بس سرحت في نور مضلم، ونسيت إنه هو النور.

رائع بجد
وسلاااااااااااااااام

RAMA يقول...

أنا جنبه والله..
أنا بس يمكن نسيت..

يااااااه يا مصعب ، إنت جيت على الجرح أوي

يارب نكون جنبة ونكون فاكرينة

بجد البوست أثر فيه أوي

:)

smraa alnil يقول...

انا كمان نسيت بس كلي ثقة اني هرجع تاني وانه مش نسيني

leila يقول...

3aref ana dayman ba7es ennak betkteb elly ana 7assah, ka2enny batkalem b lesanak :))) bgd mahma kont ha7awel a3bar 3an elly 7asah makontesh ha3raf zay manta edert

"ويسكت منه الكلام"
yaaaaaaaaaaaaaaaaaaaaahya mos3ab bgd to7faaa :)))

Salma Amer يقول...

نور مضلم
قريت الجملة دي و سرحت و قريتها تاني
انا حقيقي فهماك قوي قوي وحاسة بالكلام

النور مش مضلم بس كتر الهم بيخليك تفقد الرؤية احيانا بس انت هنا وما بعتش ولا نسيت أنا متاكدة
وغمض وفتح حتلاقي نور رجع
تحياتي من القلب من جوة

Иεşċąfě &иεmö يقول...

المشكله ان كلنا عرفين العلاجلكل مشاكلنا بس للأسف بننسي نأخده بس فعلا هو ربنا عمرة ما نسينا

OMA يقول...

more7a awy ya mos3b...te7s enk 3ayz ttnhd kda w t2om te3'sl weshk :)
ranma ye3ena kolna

عمر محمود يقول...

عفواً
انا مش داخل اعمل إعلان والله
بس الوقت ضيق
فاضل على عرفة يوم
ناويين على إيه

8 ذى الحجة

Angel يقول...

اللهم انت ربي لا إله الا انت خلقتني وانا عبدك وانا على عهدك ووعدك ما استطعت اعوذ بك من شر ما صنعت وابوء لك بنعمتك علي وابوء بذنبي فاغفرلي فانه لا يغفر الذنوب الا انت

moodysalihamidzic يقول...

كل سنة وانتم طيبين