الجمعة، مايو 04، 2007

هلاويس.. لسة!


معروف عني في المكتب وفي العائلة بعض الحقائق
ما بأحبش آكل سكريات كتير، وأفضل أكل الحاجات المالحة
بأحب أشرب سوائل مسكرة
بأعشق اللبن
بأعشق البيبسي
حتى لما بآكل سكريات بأحب الحاجات البيضا.. شوكولاتة بيضاء أكتر من العادية، كريمة أكتر من الشوكولاتة في الجاتوه، فانيليا أكتر من الشوكولاتة في الآيس كريم وهكذا..


المهم.. كنت قاعد امبارح مع هواري، وقلت له

"هو يا أخي مش ناويين يعملوا بيبسي باللبن؟!”

بصلي كده وسكت.. فلقيت نفسي مضطر أشرحله..

“أصلي ساعات يا هواري بأبقى عطشان أوي وعندي في نفس ذات الوقت حموضة.. فبأبقى عاوز أشرب بيبسي ساقع كده علشان يقتل العطش اللي في زوري.. بس الصودا بتشعلل الحموضة.. وفي نفس الوقت نفسي أشرب لبن علشان يقضي على الحموضة بس لبن اليومين دول مغشوش فما بيشبعش العطش زي ماهو المفروض (أصل اللبن الحاجة الوحيدة اللي ممكن تستغنى بيها علميا عن المياه والأكل وتعيش عليه طول عمرك.. بس مش لبن اليومين دول) ..

ده حاجة، حاجة تانية بقى إني ما بأعرفش أشرب بيبسي على بطن فاضية، وده بيجنني “

هواري بصلي وضحك.. وقضينا الليلة وعدّت.. وقمت النهاردة الصبح عطشان، وعندي حموضة، بس ما لقيتش هواي علشان أسأله.. فاضطريت أتسائل مع نفسي:

إلا هم صحيح مش ناويين يعملوا بيبسي باللبن؟!

هناك 19 تعليقًا:

اروي الطويل يقول...

لأ للاسف مش ناويين
بس هاقلك علي فكرة حلوه جدا
جربها انت هات كوبايه لبن علي كوباية بيبسي وشوف ايه اللي حيحصلك بس ابقي اتاكد انك واق قدام مستشفي ولا اقلك روح ادخل واحجز سرير علشان تتأكد ان حد هيعبرك
****
مجرد نصيحه

ola salem يقول...

غمست الايس كريم بالعيش
فعايز بيبسى باللبن!!!!!!!

هقول ايه؟

عيش ندل تموت محروق
هى هى هى هى هى

قضية عم أحمد Ahmed Case يقول...

والله فكرة يا ابو مصعب طيب ما انت عاؤف فيصل صاحبنا ابن صاحب التوكيل ابعتله اقترح عليه .

بس حلوة بيبسي ابيض بيبسي اسود بيبسى بانمي للبنات .

بي انت بتحب الابيض علشان لون قلبك الابيض .

ربنا يكرمك حبيبي ليك عليا اول لما يطله البيبسي ابو لبن انا اللى احلبهولك قصدي اجبهولك

الحلم العربي يقول...

بيبسي باللبن يا مؤمن...قصدي يا مصعب
و الله فكرة ..أنا بقول تروح تقدم الاقتراح الفزيييع ده لشركة بيبسي نفسها أكيد هيعينوك عندهم في قسم الافتكاسات و يصرفولك صندوق بيبسي باللبن كل يوم لوحدك...بس ما قلتلناش تحبه لبن خالى الدسم و لا كامل الدسم و بودرة السيراميك اللى فيه تبقى كليوباترا و لا الجوهرة ...
تحياتى لهلاوسك

أحمد الدريني يقول...

زمن يأكل فيه الكلب العجوة
ويشرب فيه السمك القهوة
ويلعب فيه الفيل الطاولة
خليق بأن تفكر فيه في البيبسي بلبن
بس مصيبة لما يطلعوه يقولوا:
بيبسي من مزارع طبيعية
خير بلادنا...

غير معرف يقول...

السلام عليكم و رحمة الله و بركاته
بص انا الاول نفسي جزّعت جااااامد من السكريات اللي بالهبل دي خصوصا لما جبت سيرة الشيكولاته البيضا اللي انا ماباحبهاش بالعكس باحب السمرا -مش العاديه-يعني بمعنى اخر اللي بيقولوا عليها الشيكولاته المرةاو الغامقة او السودا ما علينا .. و بعدين قعدت تقول الكريمة و البتاع . كنت خلاااااااص هارّجع ....... بس اول ما قلت بيبسي باللبن .. ماقدرتش امسك نفسي من الضحك.. بجد هلوسه عاليه اوي
مش كفايه انك مش مقاطع البيبسي و كمان كاتب عنه لا و ايه عايزه باللبن
عشان يقولولك حُلب بأيد مصريه .......هههههههه
ربنا يتوب عليك يا مصاعيبو ياااااااااااارب

the wall

LAMIA MAHMOUD يقول...

بيبسي باللبن

تصدق فكرة قدمها لصاحب الشركة وهو يديك فيها سرة دنانير يا ابني


درب انت بس

اكتب على البوست ده براءة اختراع

Amira Hassan يقول...

بيبسي باللبن يا مصعب

فكرتني بالنتكته بتاعت جيلاتب الكوسة

عمتا بيسطة ..حطهم على بعض يا سيدي و دوس

حلم الحرية يقول...

ممممممممم

بيبسي باللبن

مش عارفة بس متهيالي طعمها مش حيكون حلو
عموما احنا فيها
واحدة سبورت كولا (عشان بيسبسي مقاطعة )وعليها كوباية لبن
وابقي قولنا عالنتيجة

حضرتك متقلقش احنا حجزنا جناح المستشفي احتياطي
يعني احتمال غسيل المعدة طبيا قائم


ابقي قولنا علي نتيجة التجربة
عشان نستفيد يعني

غير معرف يقول...

يا راجل


مانحصحكش

:)

Camellia Hussein يقول...

بص في حاجة بتديني احساس اللبن والبيبسي والخس والمانجة في لحظة واحدة



اللبن الرايب اشرب وادعيلي


بس خد بالك عشان جهينة عملت رايب بالليمون طعمه وحششششششششششش اويييييييييييي

Oma يقول...

masa2 eldema3' el 3alya
ana mab7ebsh el labn 5ales ya mos3b
garb enta te7ot el etnen 3la ba3d
wla a2olk..blash..kefaya 3lek el zayda w el3mlya eltare5ya bet3atk

metcy يقول...

ana kan nafsi ba2a fi 7aga tania,,,
ya3malooh al 3asiir 2asb fi cans,,,bas lil asaf mafiish

metcy يقول...

ana kan nafsi ba2a fi 7aga tania,,,
ya3malooh al 3asiir 2asb fi cans,,,bas lil asaf mafiish

elkamhawi يقول...

انا على فكرة مبحبش اللبن
وبحب البيبسى
ومش بشجع الاقتراح ده خالص
بس فكرة حلوة منكرش

Salma Amer يقول...

واللهي مفيش حاجة بعيدة ممكن بكرة نصحى الصبح نلاقي لبن بالبيبسي أو زبادي بالبيبسي كله جايز
اهم حاجة الحق سجل براءة اختراع احسن حد فعلا ياخد الفكرة منك ويعملها

dead man يقول...

عن رحلات البيبسي الليتر نتحدث
:D

بص يا جميل حلك عندى .. لما ابقى معاك بعد كده اجيبلك الأول لبن رايب علشان الحموضة .. بعدين نشرب بيبسي براحتنا.. ولا يهمك

انت تامر

دوللي يقول...

والله يا مصعب انا جربت الموضوع دا حطيت البيبسي على اللبن بس كان لبن رايب ودا كان من يجي 8 سنين كده واديني اهو قدامك زي الفل جرب وتوكل على الله يمكن تاخد براءة اختراع دول عملوا فيروز خوخ مش هينفع يبقى البيبسي باللبن :)

Nasr Misr يقول...

هما جربوا يعملوا زبادي بالبسبوسه في إعلان دانون، بس للأسف منفعش، عموما في أفكار جديدخ اليومين دول والتجارب شغاله عليها:)