الثلاثاء، يناير 30، 2007

الطريق إلى الأزهر بارك !

معلش يا عمرو
معلش يا رضوى

أحبكما جدا
وأعلم أن الطريق إلى الآزهر بارك طويل!

آه والله :(

أنا امبارح اتزنقت جدا في الشغل فما عرفتش أنزل قبل الساعة خمسة ونص..
واستأذنت بدري علشان ألحق حتى أبارك لكم
واسألوا براء ودعاء ومديري في الشغل!

هو امبارح أصلا كان يوم زبالة من أوله بجد معايا..
ما حصلش فيه حاجة عدلة غير إني سلمت شغلي في معاده..

المهم أنا ركبت -حسب وصفة براء التذكيرية- للجيزة علشان أركب منها سيدة عيشة ومنها أي حاجة تنزلني عندكم..

في الجيزة كانت الدنيا زحمة بشكل بشع..
ومفيش ولا ميكروباص سيدة عيشة مش شايل قد حمولته تلات أضعاف على الأقل..
الناس اللي بتركب الخط ده أكيد فاهمة أنا أقصد ايه..
لدرجة إني كدت أيأس ، وبالفعل بدأت أتراجع إلى ميدان الجيزة وفي ذهني بدأيتراقص شبح انهزام
ده حتى واحد معدي لا يعرفني ولا أعرفه ولا أذكر من ملامحه سوى عينين بهما خبث ثعالب الأرض مجتمعة وشارب كث وشعر أسود ثقيل يقول لي : “يا ريتنا ما جينا على وش الدنيا دي ... صح؟!”
كنت هأرد عليه أقول له : “آه والله" لكن فجأة وقف قدامي مباشرة ميكروباص سيدة عيش ةفاااااااااااااااااااضي.. قلت له بكل قوة : “لاااااااااا... الحياة حلوة" وقفزت في الكنز..!!

وصلت السيدة عيشة على الساعة ستة ونص..
إني ألاقي حاجة أركبها... أبدا..

وبتوع المرور الله........... وللا بلاش
ما بيسيبوش ولا عربية تقف..

الساعة سبعة إلا ربع اتصلت بي دعاء وقالت لي إنهم خلصوا وبراء أخد منها التليفون وقال لي استنانا وقابلوني ورحنا سوا تاني على عشرينات..

أنا آسف جدا جدا جدا يا عمرو ويا رضوى..
كان نفسي أبقى موجود بجد

مبرووووووووووووووووووووووووك يا عمرو
مبرووووووووووووووووووووووووك يا رضوى

بارك الله لكما وبارك عليكما وجمع بينكما في خير

هناك 14 تعليقًا:

أميرة البلطجية يقول...

أنا معرفش رضوى وعمر..لكن بقالي كام يوم كل مافتح عمرانية دوت نت الاقي اخبار فرحهم..ربنا يباركلهم ويسعدهم
الطريق اليومين دول فعلا تعدي كل حدود اللا طبيعية.. والمشاور تضاعفت مدته عن الاسبوع اللي فات لسبب غير معروف..

ياء يقول...

عقبالك يا باشا

واحـــد مـــــن الـنـــاس يقول...

الف مبروك
وعايزين نفرح بيك يا ابو المصاعيب بقا
عارف لو معزمتنيش ؟!!

:)

Yasmine Adel Fouad يقول...

ايه ده فعلا
ربنا يوفقهم بقى و يجعلهم خير لبعض
اوعى تعمل فرحك بقى فى الازهر بارك و ماتعرفش تروح
:)

غير معرف يقول...

ربنا يكون في العون..الحمد الله إنك وصلت ..أظن معاد وصولك كان تناي يوم الصبح :)ه

المهم مبروك وعقبالك..
معلش ..أنا كنت علقت على تعليقك في مدونة صديقك البراء على موضوع فرح عمرو ودعاء ..التعليق ده ..ونقلته علشان بميبقاش في حاجة في النفوس
--------
مبروك وربنا يتمم بخير

لمصعب

فعلاً المتخلفين ملو الانترنت..أقترح عمل تشريع لمنع دخول فئات معينة للإنترنت...

او تفكرلنا في فكرة جهنمية لربط الانترنت بالاستشعار عن بعد ..بمعنى المدونات والمواقع الحوارية تمنع تعليقات المتخلفين إلي ملو الانترنت اوتمواتيكي ..

بلا وجع دماغ...خنقتني يا مصعب !!

هي ناقصة تضيق وحجر

We2am يقول...

yaaaaaah...enta hat2olly 3al mwaslat aslan? ana mt7'n2a m3a elbhsr kolha 3shan el t27'er dah :S
m3lsh 7'erha fe 3'erha..tro7lhm fe bet.hom isa :)
alf mabrook lehm :)

مُصْعَب إِبْرَاهِيم يقول...

أميرة .. آه والله .. الدنيا كانت زحمة موووووت

ياء ... ربنا يخليك يا حبيبي عقبال ما نفرح فيك قصدي بيك

واحد من الناس ... أعرفك من أعرف أنت مين وأعزمك على طول :) ... بس هي فين بنت الحلال؟ عندك عروسة؟

ياسمين.. أنا مش عارف فعلا هأعرف أوصل فرحي وللا لا :)


محمد مصطفى.. بالنسبة للجزء الأول الله يبارك فيك يا افندم

بالنسبة للجزء التاني.. أنا ما أعتقدش إني قلت حاجة غلط.. كل اللي عملته إني بأهون على صاحبي.. ما قلتش للناس ما تعلقش!
ده أولا ...

ثانيا : أنا بأحترم جدا جدا جدا حرية الآخرين لأني بأعشق الحرية، الحرية المسئولة... وجملة زي اللي حضرتك قلتها بتجرح بجد.. ربنا يسامحك

مُصْعَب إِبْرَاهِيم يقول...

وئام.. انتي علقتي وأنا بأرد على التعليقات تقريبا فما شفتش ردك..

آه فعلا أنا كنت تقريبا هأقتل حد ساعتها يا إما هأنتحر!

غير معرف يقول...

أعتذر لو كنت جرحتك أو سببت ليك أي إزعاج..وبغض النظر عن رأيي في إن تعليقي مكنش من النوع الجارح..

ولو في تحفظ على بعض الآراء ..في إمكانية لعمل فلتر للتعليقات..يمكنك من خلاله الاطلاع على التعليق قبل نشره..تنشر من خلاله التعليقات المناسبة ليك وتحجب الغير مناسب أو إلي إنت شايف إنها متخلفة من متخلفين !!

وكون إنك سبت الباب مفتوح للجميع ..المتخلفين وغيرهم..فتستحمل ..لإن هتلاقي ناس ممكن تسبك وتجرحك بجد...وهتلاقي ناس شايفة إن ليها حق الرد ولكن ممكن يكون اسلوبها مش ساعفها ..زي حالي كده..وللأسف هو ده الانترنت...زي ما ليك حق الكتابة والنشر على الملأ ..استحمل ..الرد والنقد..من غير عقد أو نفسيات حساسة..وتعليق يفوت ولا حد يموت

دي وجهة نظري..وأعتذر مرة تاني..

مُصْعَب إِبْرَاهِيم يقول...

عزيزي محمد مصطفى ... اللي جرحني في تعليقك كلمة "بلا تضييق وحجر"..

لأني من أكتر الناس اللي بيكرهوهم، زي ما أنت قلت أنا سايب الباب مفتوح للجميع علشان أنا بأحترم حرية الآخر في إبداء رأيه.. مع إني عارف (بكل تأكيد) بخاصية الرقابة على التعليقات وبكل الخاصيات الأخرى لأن شغلتي أصلا مبرمج ومطور مواقع انترنت ومهتم جدا بكل جديد في المجال..

ومع ذلك .. أرجع وأوضح لك نقطة صغيرة .. أنا ما قلتش حاجة وحشة على ناس بعينهم، أو ما وجهتش كلامي للمعلقين من الأساس في التعليق اللي أنت بتتكلم عليه..

كل اللي كنت باعمله ساعتها (ومش عارف ده واضح لك وللا لا) بأهون على صاحبي من تأثير تعليقات "متخلفة" عليه... وأعتذر لو كلمة "تعليقات" فيها إساءة أدب يعني!

وبرضه أرجع أفكرك للمرة الخمس تلاف ... أنا ما بأتكلمش على حد بعينه وما غلطش في حد بعينه...

وظاهرة التعليقات المتخلفة موجودة شئنا أم أبينا... أتمنى بس إنها ما تحرقش دمي ولا دم الناس اللي بأحبهم كتير...

اتمنى تكون الصورة وضحتلك

وأشكرك جدا على شجاعتك واعتذارك...

غير معرف يقول...

الحبيب مصعب
حصل خير..بصراحة أنا مش شايف لازمة لتصنيف التعليقات إلى تعليقات متخلفة وتعليقات بفيونكة ودانتيلة...

لإن إلقاء وصف التخلف على أي رأي ناقد أو مخالف يعد إستسهال وفي بعض الاحيان تعالي..وفي الحالتين ضرره أكبر ..يعني لا الواحد يقدر يشوف عيوبه ولا يصلحها ولا يعرف فين الصح من الغلط وبالتالي هيحصل زي ما النظام في مصر ما بيعمل ...شايف كل الناس متخلفة ومش فاهمة ومش مقدرة جهوده في إعمار البلد وإصلاحها..وبالتالي الوضع زي ما إنت شايف النظام عمال يزيد غرور وتكبر وبطش وشايف إن كله تمام ..ومبينغصش على البلد عيشتها غير شوية المتخلفين إلي مش فاهمين نظريات النظام وحكمته...

ليك مني كل تحية ..
وعلى فكرة أنا بقالي فترة طويلة مبدخلش على النت..ودي أول مرة أعلق فيها على مدونتك
بس معلش خبطت فيك المرة دي..

moodysalihamidzic يقول...

ان شاء الله تؤجر بالنية يا مصعب
وربنا يسعدهم

Haitham Abu Akrab يقول...

يا سيدي الف مبروك ليهم
والف مبروك ليك
عالبوست اللي راجع بيه بعد غياب

كان نفسي اعمل كومنت
بس الصوره جامده

nour يقول...

مبروووك يا عمرو
مبروووك يا رضوى
مصعب يا بنى معلش بقى انك ملحقتهمش
ان شاء الله متعوضه فى اولادهم بقى:)))
بقالى كتير مزرتش المدونه دى علشان كده كنت حاسه ان فى حاجة ناقصه
:)))