الجمعة، ديسمبر 22، 2006

أنا والتعليم وهناك!



"يحكى أنه قبل سبعة عشر قرنا من الزمان (إلا 1685 سنة تقريبا!) كان هناك طفل يدعى مصعب في بلاد تدعى مصر يدرس بالصف الثاني من الحضانة المعروف بالكود الحركي (KG 2) ...

كانت دراسته هادئة إلى أن قررت أسرته أن ينتقلوا إلي بيت آخر، وبالتالي اضطر والده أن ينقله لمدرسة جديدة بجوار المنزل الجديد، وحيث أن KG 2 كانت أعلى في مصاريفها من الصف الأول الابتدائي فقد استغل مدير المدرسة الجديدة (الشرير) أن الطفل كان أصغر بشهرين أو ثلاثة من الصف الأول الابتدائي وألحقه ثانية بـKG 2!!"

آه والله دي بدايتي!
حتى أي حد على الماسينجر (أو على الطبيعة) بيسألني عن تاريخي الدراسي أقول له "دي قصة طوييييييييييييلة تعود إلى KG 2" وما يصدقنيش!

ما علينا.. وصلت لغاية الصف الثالث الابتدائي متأخر سنة بسبب العملة المنيلة بتاعت اسمه ايه ده، وفي التيرم الثاني (كان فاضل شهرين أو تلاتية على الامتحانات تقريبا) والدي قرر إنه يسافر يشتغل برة..

سافرنا باكستان واستقرينا في العاصمة إسلام آباد اللي فيها الجامعة الإسلامية العالمية اللي والدي رحمة الله عليه كان بيدرس فيها شريعة وقانون (أصله خريج دار علوم)..

في نفس هذه السنة -اللي كان فاضل فيها شهرين- بابا قدم لي في السفارة المصرية علشان أمتحن خامسة ابتدائي!

ولأن الامتحانات كانت من منازلهم الوضع ما عجبش بابا، فراح مقدم لي في معهد يمني (سنة رابعة ابتدائي) وكانت مواده تقيلة أوي أوي، أنا فاكر إننا أخدنا كتاب "أجرومية" –نحو يعني- فيه كل النحو اللي أخدته في مصر لغاية أما اتخرجت من ثانوي، وفيه حاجات كمان ما قابلتهاش!

المعهد اليمني كمان كان من منازلهم!
ولذلك قرر أبي أن يلحقني بمدرسة باكستانية، وبالفعل ذاكرت التلات مناهج وجبت ساعتها متوسط 92 %... آه بجد..

التلات سنين اللي بعد كده (من أولى لتالتة إعدادي مصري) عديت على حاجات كتيييييييييييييير أوي أوي..

قعدت تيرم ونص في معهد أزهري -مش فاكر في سنة كام-، وسنتين في مدرسة سعودية، بالإضافة لامتحانات السفارة بكل تأكيد وكذلك مدرستين باكستانيين أخريين!

وأنا في تانية إعدادي أصبت بمرض الصفراء (التهاب كبدي وبائي A) و يادوب ذاكرت قبل الامتحانات بتلات أسابيع لما كنت خفيت والحمدلله ربك ستر..

وأنا في تالتة إعدادي مصري –ركز أوي هنا- كنت بآخد ثانوية عامة بريطاني (GCE) في مدرسة تركيا عاملاها في باكستان! كانوا على سنتنا لغوا الـGCE ونزلوا نظامين أسهل GCSE و IGCSE بس مدرستنا أبت إلا أن تدرس GCE اللي كان أكثرهم شمولا وصعوبة، ولسة معايا كتب منها لغاية دلوقتي، ما تستغربوش .. أصل هم هناك بيعاملوك على مستواك العقلي مش سنك زي بلدنا الموقرة مصر، وكانوا بيقولوا لي : "لغتك الإنجليزية ضعيفة –اللغة بتاعت التعليم في كل مدارس باكستان اللي حضرتها كانت انجليزي- .. علشان كده مش هنعرف نطلعك أكتر من كده بس أنت عقلك يجيب"، بس للأسف رجعنا مصر قبل شهر من الامتحانات وإلا كنت هأبقى واخد ثانوية وأنا عندي 14 سنة!

رجعنا مصر، و حصلت شوية ظروف ملخبطة كتير، ووالدتي توفيت والظروف اتلخبطت أكتر، المهم دخلت المدرسة متأخر شهر ونص تقريبا علشان كان بابا مشغول في دخول بقية إخواتي المدارس وأنا كنت بأساعده..

بعد خناقة بين بابا ومدير "أحمد لطفي السيد الثانوية بنين" اتقر بي المطاف في فصل أولى أول (1/1 ث) "أحمد بهجت فتوح الثانوية بنين"، وهنا ابتدوا يعاملوني على إني كائن فضائي، وكان في مدرسين ما يتنسوش أبدا، أستاذة "هالة" مدرسة الإنجليزي اللي كانت بتحلف بي وبتتباهي بي وسط بقية أولى، و الأستاذة "ليلى" ربنا يـ.. وللا بلاش بتاعت الرياضيات اللي كانت مستقصداني مش عارف ليه!

طلعت تانية ثانوي (فصل تانية أول)، ولأن امتحانات تانية كانت جاية لناس بتحفظ من غير ما تفهم، ولأني ما بأحبش أحفظ من غير ما أفهم ولأني ما ذاكرتش غير آخر شهر بس جبت 89 % تقريبا –يعني ما كنتش أحصل هندسة حلايب وشلاتين!!- ولأني كمان كنت مشترك في الصحافة المدرسية وبأزوغ من بعض الحصص المملة! المهم عدت على خير ودخلت فصل تالتة أول!

كنت أقل واحد جايب مجموع في الفصل، كان معايا ناس جايبة 98 % وأرقام فلكية أخرى! –مش فلكية أوي بس بالنسبة لمستوى المدرسة- وكانوا بيتريقوا علي أوي جدا! أنا اتعلمت الدرس كويس من تانية ثانوي فذاكرت المرة دي آخر شهر وأسبوع ودخلنا الامتحانات.. كانت جاية لناس بتفهم، بتقول لنا تعالوا فكروا.. شغلوا عقلكم! دفعة تالتة في المدرسة كانت 1500 بني آدم، 10 منهم فصل مجموعهم زي ما هو، أنا وواحد تاني بس اللي مجموعنا زاد والباقيين اتخسف بيهم الأرض، وهندسة نزلت سنتنا 3 درجات % كاملين في التنسيق!

جبت في تالتة 94.6 % ليصبح مجموعي الكلي 92.2 % تقريبا وألحق هندسة الفيوم، ويالسخرية البتاع أقابل واحد من اللي كانوا جايبين 98 وبيتريقوا عليّ في "خدمة اجتماعية الفيوم" اللهم إني أشهدك أنني لم أشمت به ولن أفعل!!!

التيرم الأول في هندسة (4 امتياز، تلاتة جيد جدا، واحدة مقبول)، التيرم التاني كانت وفاة والدي الله يرحمه فشلت مادة للأسف، بس لما عديتها كان تقديري الكلي (جيد جدا)..

حولت هندسة القاهرة بشبه معجزة، وحاولت أدخل قسم من الاتنين اللي داخل علشانهم الكلية أساسا، عمارة أو حاسبات، ولأن حاسبات كان خارج متناول اليد انتظمت في عمارة وحضرت بالفعل شهر كامل و ....

ولقيتهم بيقولوا لي نتيجة تنسيقك لسة طالعة واختر مما بين الأقسام :
(مدني – ميكانيكا – بترول – معادن – كيمياء)

اخترت مدني باعتبارها أقرب حاجة لعمارة، واشتدت المشاكل والخلافات العائلية (ربنا يجازي كل اللي كانوا السبب وكل حد كانت نيته وحشة) وسقطت!

كان من حقي أدخل القسم اللي عاوزه فحولت حاسبات، وبرضه للأسف سقطت كمان مرة، وبقيت بأمتحن من الخارج، و لأني كنت بدأت أشتغل ما عرفتش أنظم وقتي أوي، وحصل شوية حاجات وظروف أخرى (مش وقتها خالص دلوقتي) تم فصلي من الكلية وكانت الاختيارات المتاحة أمامي كالتالي :
(تجارة – آداب – خدمة اجتماعية – حقوق) والأربعة انتساب.. أنا اخترت تجارة لأسباب تتعلق بخطتي في حياتي نوعا ما، ولا زلنا في انتظار ما يخبئه لنا القدر..

حاجة أخيرة.. أنا هنا فقدت 90% من الانجليزي اللي اتعلمته في حياتي، وأشياء أخرى كتير..

حسبي الله ونعم الوكيل في كل مسئول عن أحوال التعليم هنا وأولهم حسني مبارك.


هناك 28 تعليقًا:

emz يقول...

ما شاءالله .. ربنا يكملكبعقلك يا مصعب :P

Lens Geek يقول...

You should be proud of yourself. Man with a lot of experience is a man with a lot of wisdom.

learn from the next quote
"Experience is what we get when we do not get what we want." ~ Enio Carvalho

nour يقول...

ايه يا بنى المآساة دى
ده انت ربنا يكون فى عونك بس الحمد لله عدت

saso يقول...

هوا انا حاولت اركز واستوعب..بس بجد ماعرفتش اتخيل نفسي مكانك
رجعت للبروفايل لقيت سنك عشرين..كل دة يعدي عليك في اقل من عشرين سنة وتقلبات وشوش ولهجات واسماء وصحاب
ربنا يكون في عونك طبعا..بس اكيد كده احسن ربنا عاوزك تمر بدة اكيد

غير معرف يقول...

the mere fact that your brain still able to work after all these changes is impressive.

Amira Hassan يقول...

اه...افتكرت..في يوم من الايام اللي ببقى فيهم متهورة طلبت منك انك تحكيلي حكايتك ممع التعليم...بجد انا اشفقت عليك جدااااااااااا.....سوري بس اصل احنا اساسا بلد********

محمد السيد..مش حاسكت يقول...

ايه ياعم ........

إيه الجمال ده ؟؟؟ في حتت كتير حسيت إني ممكن أستعير نفس العبارت ويمكن أحداث متشابعة ....

أنا ياسيدي بقي اتولدت في اليمن وجيت وأناعندي ست سنين ...

يمكن مفتكرش حاجة كتير من أيامها ...

ويمكن أيام الابتدائي والإعدادي والثانوي مرت بيا علي خير ...

والفضل كده يرجع للمدرسة العظيمة اللي بجد الواحد اتعلم فيها كتير ... " المدينة المنورة "

والفضل فيها للإخوان المسلمين اللي فعلا ربوا وعلموا وتعبوا فينا عشان ما يطلعونا ناس محترمين وكويسين كده ....

لكن كانت المشاكل بعد كده


لا للتمديد ... لا للتوريث ... نعم لتعديل الدستور المصري
mohamedmat@hotmail.com

محمد السيد..مش حاسكت يقول...

كانت المشاكل في الجامعة وما أدراك ما الجامعة ...

الغربة في القاهرة ... البعد عن أحلي حتة في الدنيا " الإسكندرية "

المدينة الجامعية واللي فيها .... سواء العصافير سواء الجهل الثقافي اللي يشل ... سواء الولاد اللي كل حياتهم بنات وحاجات من دي ...

الشقة اللي كانت من غير عفش وساكن فيها كام واحد ...

الأوضة اللي فوق السطوح الللي تفكرك بفيلم " شباب إمراة " ...

والنهاية السفر رايح جاي ... من القاهرة للإسكندرية في القطر المميز ... لغاية لما تطلع عينك ...

خلال الفترة دي .. ونتيجة للتنطيط .. طبيعي انك تعيد سنة تالتة ...

وطبيعي لما تتمسك في مظاهرات القضاة أيام الامتحانات تعيد سنة رابعة كمان ....
وهي اللي أنا وصلت لها دلوقتي ....

بس برضه مش حاسكت
لا للتمديد ... لا للتوريث ... نعم لتعديل الدستور المصري

We2am يقول...

deh ma2sah e3'reqyya aslan!!!
ana te3bt awe awl masm3t.ha esra7a..w an leha naseeb kber fe ene 2olt enk momyz w mmkn netsa7b..rbna yenwrlk tare2k yabne..shoft masr baldna weslt feen? :D

غير معرف يقول...

المهم انك رجعت بالسلامة ياوغد وطلعت من المعركة علي خير دون فقد ايا من أطرافك..
واحمد الله انك متنبه انك توازي حمار في المعرفة مادام التعليم المصري قد وضع بصمته فيك..
انا عن نفسي بحس اني قبيلة من الحمير بسبب التعليم اللي اتعلمته
فقط علينا أن نعلم انفسنا بأنفسنا يافتي

TheSane يقول...

كويس انه حصلك ده كله والا مكنتش قابلتني :P

غير معرف يقول...

والله يا مصعب ..بعيدا عن كل اللى حصل ده واللى هايحصل .. إنت عارف طبعا إن هى دى الحياة ولازم يحصل فيها كدة عشان نتعلم من المواقف دى كلها
لكن إنت فاكر التفاصيل دى كلها إزاى؟؟
!!
:)
على فكرة يمكن دى على ما أعتقد تعليقى الأول فى مدونتك لكن كنت عايز أشكرك على مقالاتك كلها ..أنا متابعها من فترة
وأكتر حاجة عجبانى فيها الطابع العائلى اللى فيها يعنى وأنا بقرأ مقالاتك بحس إنى مع صاحب أو أخ مش مجرد مع كاتب فى مدونة
تقبل صداقتى
وبالتوفيق دائما إن شاء الله
:)

frozen love يقول...

wlahy ya abo ms3b....ana fakr m3anatk ayam elmdrsa...we knt bt7kely elm2sah de..lol,,,kl ely a2dr a2olholk gher eno nsebk y3ny...enk lazm t3tbr kl da khbra lek...we ht3rf bnfsk eny mafesh 7aga 3mltha we mstfdsh beha....rbna ytwlana fe elbld elghreba de ya sdeky

Mony The Angel يقول...

elwa2ty fhemt ma3na kalamak lama gah aldoor 3aleek 3shan t3arraf nafsak :)
bgad rabena ykoon f 3oonak
pravo enak lsa 3aiesh, w pravo enak ader tkammel

غير معرف يقول...

الاخ العزيز مصعب

اولا: يا سيدي

نسأل الله ان تنجح وتخلص من الكلية والدراسة
وتحقق حلمك

ثانيا : اوقات يمر الانسان بأحداث قد يرى أنها سئية له لكن مع الزمن ومرو الوقت يرى انها كانت الخير له

والانسان منا يقاس بخبرته في الحياة والخبرة تبنى بكل موقف وأزمة يمر بها الانسان التي تزيد من شخصيته ثقلا

أنا أغبطك لأنك عارف انت عاوز ايه وماشي في سكة محددها قبل ذلك
اعانك الله يا مصعب الخير

مجاهد شرارة

dead man يقول...

تخيل معايا كده لو الامتحانات في مصر جت للي بيفكروا مش بيحفظوا تفتكر نسبة النجاح هتبقى كام؟

Dananeer يقول...

عارف احلى حاجه ايه
ان كل الحاجات دى خلتك مصعب اللى احنا عارفينه

اللى محولتوش كم المشاكل المش معقوله دى
لكائن لا بيفكر و لا بيفهم

ربنا معاك فى امتحاناتك
و تحقق المشروع
;)

صور دريم حلوه
حقدت عليكم رغم انى جبانه

bagabigo يقول...

ربنا معاك

bagabigo يقول...

thank u 4 ur comment and ur support

معتـز عبد الرحمن يقول...

ربنا يكرمك يا مصعب

وياسيدي يمكن أكون أنا من المستفيدين من اللخبطة اللي حصلتلك دي ، على الأقل قابلتك في يوم من الأيام؟ ولا إيه؟

وطبعا لا يخفى على أحد مشاكل التعليم في مصر ومنها طبعا كليتنا العزيزة

لكن برضه أنت كانت ظروفك خاصة شوية
والحمد لله رب العالمين

ويمكن ده كله كان إعداد ليك لشيء معين انت لسه متعرفوش
الله أعلم
وربنا يوفقك لما تحب وترضى

ابن مرّ يقول...

انت قوي قوي
لأن السلاسل تعلمنا أن نقاتل
بجد أنا بحترمك جدا جدا جدا
جايز ما اعرفكش ولكن أكيد شخص زيك لازم النا تسعى انها تتعرف عليه

ربنا يباركلك في دنتك وآخرتك

Bahz.Baih يقول...

يااااااه يا عم مصعب
وانا اللى كنت فاكر أن قصتى مع التعليم غريبه

بص صدقنى التعليم مش كل حاجه أهم حاجه الدماغ الجامده

مش عارف أقولك أيه بس هو فى النهايه أنت أسقريت على أيه ... خلاص تجاره القاهره

على العموم أنت لسه صغير سناً مش عقلاٍ و لسه الفرصه قدامك تخلص تجاره و تعمل حاجات كتير

شوف كمان ممكن تتطوع فى أحد الجمعيات الأهليه المنتشره فى القاهره... هتديك خبره حلوه قوى

حاجه زى نهضه المحروسه أو مشوار أو الحالمون بالغد

هتغير فى حياتك كتير

طلال فيصل يقول...

لمصعب اذن فى عنقى اعتذار واجب
كنت كلما سألته عن اخبار امتحاناته يجيب
الحياه كلها امتحانات يا اخ طلال
واقول فى نفسى ايه الرد اللزج من هذا البنى ادم الأكثر لزوجة
معلش يا عم مصعب
اللى ميعرفش يقول ...مصر

غير معرف يقول...

عاوز اقول زى دنانير ...عارف احلى حاجه ايه
ان كل الحاجات دى خلتك مصعب

و بتمنالك كل التوفيق فى الدنيا و الاخرة و

محمود يقول...

ماشي يا مصعب يابني اهم محطة في حياتك لما اتقابلنا في احمد بهجت و يا سعدك يا فرحتك لما اتقابلنا تاني في هندسة ...لا والله يا مصعب انا الي كنت سعيد بمعرفة الكائن الفضائي في مدرستنا لانه كانعقل جميل و محترم...

غير معرف يقول...

و الله ياأستاذ مصعب "و أستاذ دى للاحترام لأنه واضح إن خبرتك فى التعليم كبيييييييييييرة قوى قوى"
بس و الله تعبتلك، إذا كان أنا تعبت من قرائتها تعمل انت ايه و انت عشتها كلها، ربنا يكون فى عونك و يصبرك و إن شاء الله ربنا هايكرمك بأحسن من كل اللى فات طالما نيتك سليمة و مع ربنا

Faheem يقول...

عموماً يا مصعب احمد ربنا انك مكملتش في هندسة
انا بقى كنت اشطر منك و نطيت لغاية تالتة على طول بس انا دلوقتي في تالتة تالت يعني من الخارج ولو كان ده حصل من زمان كنت عملت زيك و حولت تجارة فهيمة و ريحت دماغي.

shimaa يقول...

حتى أي حد على الماسينجر (أو على الطبيعة) بيسألني عن تاريخي الدراسي أقول له "دي قصة طوييييييييييييلة تعود إلى KG 2" وما يصدقنيش

2ywan hoa da eli 7sl m3ya blzbt..s2lt so2al bre2 2omt b3tli el link da eli wad7 eno kan m7wla mnk enk tre7 nfsk 3shan ama 7d ys2lk elso2al da tb3tholo :D

allah yekon fe 3onk bgd ...bs thx God 3rft 27'ern enk fe tagara w da 2ngaz fe 7d zato :D