الثلاثاء، أكتوبر 17، 2006

سلام يا "صحبي"


دفعتي حبيبتي ce2008..
سلام..
أيوة بكل فخر دفعتي..
وأيوة للأسف سلام..
النهاردة كان آخر ورقة رسمية تربطني بهندسة..
وبداية عهدي (رسميا برضه) في تجارة..

إنك "تفقد" شخص أو شيء بيبقى صعب جدا..
لكن الأكثر إيلاما إنك "تفتقده"، وإنه يوحشك..
الشخص ده هو أنتم كلكم..
والشيء هو كل لحظة قضيتها في القسم ده..
مع الصحبة دي..
لو فضلت أعدد أسماء الناس مش هأخلص..
و هأبقى نسيت حد..
علشان كده بأسلم عليكم كلكم..
من أولكم لآخركم..

و من كل قلبي "والله هتوحشوني"..
هتوحشني المجموعة بتاعت الياهو..اللي اتقسمت مجموعات
هيوحشني المنتدى اللي كل شوية يقع ويقوم..
هيوحشني جو المشاريع وضغطتها..
ومناقشتكم لجدول الامتحانات..
هيوحشني عيد الميلاد اللي أصحابي عملوه لي مفاجأة..
وهتوحشني حاجات كتير أوي..
لا تعي هذه السطور حصرها..

هأفتقد وشوش بريئة..
وابتسامات طاهرة..
وعقول منورة..
وقلوب دافية وصافية..

أرجوكم لو حد زعلان مني في حاجة،
أي حاجة .. مهما كانت صغيرة
يا إما يسامحني..
يا إما يقول لي أعمل ايه علشان أصالحه..
لأني بجد ما أقدرش على زعلكم..
وأنا أشهد الله إني لو كنت شايل من أي حد فيكم في يوم من الأيام أي حاجة..
إني سامحته..

أنا هأعدي إن شاء الله باستمرار..
لو ما كانش عندكم مانع طبعا.. 

هناك 10 تعليقات:

أميرة من غير قصر ولا بستان.. ولا الشاطر حسن كمان يقول...

ان شاء الله يكون مجرد وداع لمكان مش وداع لأشخاص
و انت يا مصعب اللى يعرفك عمره ما يقدر ينساك ابدا:)

محمود يقول...

.....

TheSane يقول...

طول ماهو صاحبك ماتقولش الكلمة دي لانها مابتتقالش غير ساعة الموت (بعد الشر عليك وعلينا طبعا :))
هينت: افتكر الفيلم :(

أحمد فؤاد الدين يقول...

الله يا مصعب البلد دي لو فيها خير كان زمانك معيد في الكلية مش مفصول منها حاجة تصبرك , كان فيه دكتور في كلية علوم اتفصل من هندسة و بعدين دخل علوم و بقي معيد و بقي بيدرس لطلبة هندسة لغاية ما بقي دكتور و كان معلق يافطة علي مكتبه في كلية الهندسة "الكلية التي طردتني طالباً و استقبلتني دكتور" عبقال ما اشوفك معلقها

المـ(همس)ـشاعر يقول...

و لا يهمك يا مصعب .. أصلا فى البلد دى مش بتقدر العقول الى فيها .. و لما تلاقى حد كده اعرف انو مش هتلاقى زى اتنين بسهولة

بس هو دا طبع الدنيا .. هنعمل ايه ..
لكن لسه قدامك مستقبل جميل اوى يا مصعب .. و يا عالم الخير فين

انا برضو طلعت من طب .. بس بمزاجى .. بعد تلات سنين و دلوقتى سعيدة اوى فى الكلية الى انا فيها .. طبعا انت عراف القصة دى

يلا عقبال ما اشوفك دكتور قد الدنيا ان شاء الله

Dananeer يقول...

اصعب حاجه حتكون ناس حتفارقهم
و سنين بتروح
بس متزعلش نفسك يا مصعب
قدر الله و ما شاء فعل
انت انسان زكى و موهوب و الحمد لله بتشتغل مش ورقه بتقول مهندس هيا اللى حتديك
صحيح احنا فى بلد ورق و براويز بس بجد و لا يهمك يا مصعب
انا عندى سؤال بس انت كان نفسك تطلع ايه و بتحب ايه؟؟
الكتابه..لو كده ليه مدخلتش اداب او اعلام و لا مينفعش؟
كل عيد و انت طيب

مُصْعَب إِبْرَاهِيم يقول...

أميرة .. شكرا جدا على الإطراء الجامد ده :)


محمود
......!

clever
ربنا يحميك يا ابني لشبابك.. هو أنا ناقص فراقك أنت كمان!

أحمد فؤش :) ..مش أوي كده .. بس أنا عندي سؤال غبستمولوجي وجودي .. هو ازاي اتفصل من هندسة و دخل علوم؟!! بيبقى متاح ليهم أربع كليات بس .. تجارة و آداب و خدمة اجتماعية و حقوق، و كله انتساب

همس .. شكرا كتير أوي.. و يا رب يوفقك انتي كمان و تنولي اللي في بالك .. و نفرح فيكي قريب .. قصدي بيكي :)


دنانير .. أشكرك بشدة .. انتي وقفتي جنبي كتير لما باكون متضايق.. مش عارف أرد لك الجميل ازاي

Mody Rap يقول...

ربنا يوفقك يا جميل و شكرا لتعليقك في مدونتي

مودي راب

We2am يقول...

yah!!dah enta toshkor rabna yabne w tbos edak sha3r w da2n..handasa deh mo3aqada :)
7'alek felpeace kida..mabrook :)

مُصْعَب إِبْرَاهِيم يقول...

مودي باشا .. ربنا يخليك..

we2am.. أهلا بيكي، و لو إني مختلف معاكي.. أنا بأعشق العلوم الهندسية ..
و لو سمحت ما تكتبيش حاجات حزينة أوي كده تاني في البلوج عندك :)