الجمعة، فبراير 17، 2006

"الشعر و الحلاقة" .. نظرة أدبية جديدة!


كنت فاكر زمان إن "الشعر" ده موهبة ابتلى الله بها فئة من الناس أقل ما يوصفون به أنهم قلة مندسة في عالمنا هذا و لكن هذه الأيام ، و عندما كبرت لأفهم الدنيا صح ، و كان أكبر الأثر و الفضل لـ"صالون" عم شحاتة الثقافي الذي أحضره كل ما بأروح أحلق "شعري" ، اكتشفت إن "الشعر" ده بتاع كل الناس ، و إن من حق أي حد يدلي بدلوه في الليلة (أحد مرادفات كلمة "أمسية" اللي اكتشفت بعد كده إن أحد أنواعها "الأمسية الثقافية" ، و سبحان الله بيتقال فيها "شعر" برضه!)

و بما إن الناس كلها "بقت بتقول شعر" ، فقد قررت أن أكتب قصيدة لحبي!

بأسأل عنك كتير!

بأسأل عنك كتير

حبيبي بحبك أوي..

و بحلم في يوم تطير

و نتغدى سمك و فطير!

بأحلم يا حبيبي

و حلمي مش كبير

بأحلم بقلة ساقعة

نشرب منها و زير!

بأحلم بلقمة صافية

و فول كبير كتير!

أنت حكاية عمري

و عمري قصير مش طويل!

ف ابتدائي شفتك أنت

و لا شفت غيرك حمير

ف إعدادي علشان عيونك

اتعلمت المعاكسة و الصفير!

علشانك ذاكرت جدا

و حلمت بالتقدير

أي نعم ما جبتوش

بس كفاية التفكير!

ف الجيش كنت في بالي

و هونت عليّ التكدير

من يوم ما شفتك

بطلت حاجات كتير

بطلت آكل و أشرب

و بطلت الشخير!

مش بس كده ، ده أنا

كمان بعت السرير!

و على رأي الـ"علامة"

"أنت الحب الكبير"

و أنا يا حبيبي ..

بأسأل عنك كتير

----------

مواطن الجمال :

- سمك و فطير : يدل على استعداد الشاعر لعمل أي شئ حتى يرضي حبيبه حتى و إن كان متناقضا!

-

- بطلت الشخير : استعارة مكنية حيث حذف الشاعر المشبه به و هو "النوم" ، و صرح بصفة من صفاته هي "المخدة"!

- كمان بعت السرير : توكيد لفظي!

----------

ملحوظة مهمة جدا : مواطن الجمال مش كاملة علشان نختبر الطالب المتفوق!

ملحوظة مهمة : العنوان مستوحى من قصيدة حقيقية بعنوان "بأسأل عنك كتير" ، من تأليف زميلي مهاب التليتي و هي قصيدة حلوة جدا ، هأبقى أجيبهالكم في يوم من الأيام

هناك 8 تعليقات:

يوسف يقول...

أنا لازم أضمها لديوان "الطشت قاللي ياحلو ياللي قوم احلق دقنك"

غير معرف يقول...

حلوة القصيده
بس فى مظهر جمالى مهم نسيت تقوله

و لا شفت غيرك حمير:استعارة مكنيه حيث شبه الشاعر حبيبه بالحمار وهذا يدل على استهزاءه به وعدم حبه له شوف انا شاطره ازاى!!

عمرو عزت يقول...

نعيما

غير معرف يقول...

معاكش حاجة اطرش فيها

العـابــــــــره يقول...

يا معلم "بضم الميم"أتفضل مواطن الجمال اللى أستخرجتها التلميذه الفلحوصه
بحلم فى يوم تطير" توريه متداريه عن ان الشاعر بيتمنى المستحيل علشان بيحب فرخه
وكمان بعت السرير:تعبير يدل على مدى عبقريه الشاعر، وذلك لانه قرر يشترى مرتبه للسرير
:ملحوظه
أشكرك لأنى أكتشفت أنى بعرف أكتب شعر
فكرتك جميله، بس أوعى تكتب شعر تانى شمت فينا الحلاقين

Nohaz يقول...

ماذا حدث
انت بتحب من وراء ظهري
خيانة
خيانة عظمي

غير معرف يقول...

ايه الاحباط ده راعوا انه مكتبش قبل كده .. هيا صحيح ملغبطه بس حلوة استمر
:)

غير معرف يقول...

عارف البتاع اللي عملتها حلوه الاحلي الصوره فظيعه بالتوفيق