السبت، فبراير 11، 2006

يوم ما كسبنا الكاس!


يوم غريب من أوله ، عمري ما شفت كده ، بس عادي خير ..

أنا مش هأتكلم عن رأيي في اليوم ده أنا هأقدم رصد للي حصل.

(1) أقوال مأثورة:

- "يا رب مصر تكسب" .. واحد في الميكروباص
- "هوبا ايه .. هوبا اه .. إن شاء الله هنكسب" .. عربية مليانة مشجعين رايحين الاستاد
- "شكرا يا ريس" .. مذيع في الماتش(شكرا على ايه مش عارف!)
- "لو كسبنا أنا هأدبح خروف" .. أحد الجيران
- "يا ناس حرام عليكوا ، ده اللي ماتوا في الانتفاضة ما كملوش ألف إلا بعد خمس سنين ، و احنا نعديهم في ليلة في العبارة و لسة لينا نفس نلعب!" .. منى نقلا عن واحد سمعته في الشارع
- "أنا سمعت جملة مأثرة في لحد دلوقتي".. منى ذات نفسها قبل ما تقول الجملة اللي فاتت
- "هو ميدو ما نزلش ليه؟!" ..أحد الزملاء في الشركة
- "نجم الموسم ده و الله الحضري و محمد بركات" .. بعض أصدقائي
- "نفسي مصر تخسر .. علشان الفوز ما يروحش لمبارك".. عبدالرحمن الزغيمي
- "برافو خللي الناس تحس إنها قادرة تعمل حاجة .. و إنها اتجمعت على هدف و اتحقق" .. براء في مكالمة تليفونية
- "شكرا لمبارك" .. نفس المذيع الغتيت (مدحت شلبي) بعد الماتش
- "انتوا عارفين نجم اللقاء كان مين؟! سوزان مبارك" .. أحد ركاب الميكروباز باستهزاء
- "أداء شئ للغاية.. احنا فزنا بدعاء الوالدين" .. أحد المارة منفعلا على الهاتف
- "أهلي .. أهلي .. أوه أوه!" .. طفلين راكبين عجلة بيشاركوا الناس الفرحة!


(2) أفعال منظورة

- بؤر زحام موزعة على أبعاد متساوية في الشوارع الرئيسية
- علبة بيروسول و كبريت و منها إلى لسان نار عالي في الهواء
- أعلام مصر بكل الأحجام و الأشكال ترفرف فوق السيارات
- وجوه ملونة بالأبيض و الأسود و الأحمر تملأ المكان
- أب بيقطع فرع شجرة لابنه الصغير علشان يعمله عصاية يعلق فيها العلم
- خناقة بين ولدين في أحد التجمعات الزحامية
- ألعاب نارية
- سلك ألومنيوم محروق بيتلف في الهوا
- عائلة ماشية في الشارع تصفق و تصرخ "مصر"
- ناس واقفة على الجنبين تتفرج على الشارع
- مفيش ميكروباصات نروح!
- واحد واقف يصور بكاميرا فيديو
- واحد نزل من عربيته يصور شاب واقف على العربية اللي وراه بكاميرا الموبايل
- أقنعة تحمل ألوان العلم في كل مكان
- ناس خارجة برة زجاج السيارات


(3) نيك نيم ماسيبجرات

- "أخيرا آن لمصر أن تفرح" .. معيد عندنا في الكلية
- "زي ما بيقول الناس الكأس و قعت في الرأس".. جارتنا
- "ضريبة الفوز .. غرق العبارة" .. زميلة في العمل
- "الله عليك .. يا حبيب والديك.. ارقص يا حضري" .. صديق ماسينجر
- "في البطولة كسبنا الكاس و في العبارة خسرنا الناس" .. أناة:)
- "Congratulations Egypt".. زميل كلية
- "I am Egyptian .. The Cup The Cup The Cup"..زميل كلية آخر
- "ضحايا العبارة السلام98 يهنئون المنتخب الوطني بالفوز بكأس الأمم الأفريقية".. صديق مصري في الإمارات

كفاية كده .. كملوا انتوا

هناك 3 تعليقات:

Nohaz يقول...

niaha haha haaaaaaaa ( de7ka sherera )

لعلمك بقي سوزي كانت سكر امبارح و ولا فاهمة حاجة في البتنجان زي كل حريم مصر بس كانت فرحانة زي العيال و عماله تسأل مبارك بس والله كانت عسل امبارح

اما موضوع الي ماتوا فا يا راجل دول مصريين يعني مش مشكلة في غيرهم 70 مليون الا الف صراحة مش عارفة احسبها تطلع كام
معلش هندسة بقي

غير معرف يقول...

Wallahi ely bye7sal en dal 3ala 7aga (3'er enena bnensa el masayeb besor3a men kotraha) howa en sha3bena bas mesh me7tag aktar men hadaf yegma3o..

3omoman, Mabrook.. El 7adary rafa3 rasna w Rabbena 7amana 3ala 2edeeh men el fedee7a elly kan She7ata 7ayqodna leeha lola do3a el nas el 3'alaba de bas...

العـابــــــــره يقول...

والله برافوعليك
انا ما خرجتش فى اليوم ده
لكنك نقلت لى الصوره بالضبط
ومتشكرين انك ذكرتنا فى الموضوع
وعلى رأى الناس
الكوره متنفعش من غير الكاس